BQO turǵyny 10 qap ózen shaıanymen ustaldy
ORAL. KAZINFORM — Batys Qazaqstan oblysynyń polıtsııa qyzmetkerleri «Brakoner» jedel aldyn alý is-sharasy aıasynda balyq pen shaıandy zańsyz aýlaý derekterin anyqtady.
BQO polıtsııa departamentiniń baspasóz qyzmetinen málim etkenindeı, Oral-Atyraý jolynda Kaztalov aýdanynyń turǵyny aıdap kele jatqan Toyota Camry avtokóligi toqtatyldy.
Júksalǵyshty tekserý kezinde 10 qap ózen shaıanynyń tıisti ruqsat qujattarynsyz tasymaldanǵany belgili boldy.
- Sondaı-aq atalmysh is-shara barysynda Oral qalasynda Lada Granta avtokóligi tekserildi. Salondy qaraý kezinde polıtsııa qyzmetkerleri 3 qapqa salynǵan shortan, taban jáne móńke balyqtaryn taýyp, tárkiledi. Bul balyqtar da qujatsyz tasymaldanǵan, - dep habarlady vedomstvodan.
Budan buryn zańsyz ańshylyqpen aınalysqan Báıterek aýdanynyń turǵyny qolǵa túsken bolatyn. Ol erekshe qorǵalatyn tabıǵı aýmaq – Kırsanov qoryqshasynda metall qaqpandar ornatyp, ań aýlaǵan. Oqıǵa ornynan eliktiń terisi, eki sıraǵy, qulaǵy men jaq súıekteri jáne 13 dana metall tuzaq tárkilendi.
Qazirgi kezde barlyq derekter boıynsha sotqa deıingi tergeý amaldary júrgizilýde. «Brakoner» is-sharasy 19 qarashaǵa deıin sozylady.
Eske sala keteıik, budan buryn Oralda esirtki ósiretin jasyryn fıtozerthana joıylǵanyn jazǵan bolatynbyz.