BQO trassasyndaǵy jol apaty: Dárigerler zardap shekkenderdiń jaǵdaıyn aıtty
ORAL. QazAqparat – Batys Qazaqstan oblysynyń dárigerleri Inder-Oral avtojolyndaǵy kólik apatynan zardap shekkenderdiń densaýlyǵy týraly aıtty, dep habarlaıdy QazAqparat tilshisi.
Oqıǵa 25 qyrkúıekte Aqjaıyq aýdanynda bolǵan edi. Іshinde 5 adam bolǵan «Chevrolet Niva» kóligi aýdarylyp, 26 jastaǵy er adam oqıǵa ornynda kóz jumdy, tórteýi zardap shekti.
BQO Densaýlyq saqtaý basqarmasynyń baspasóz qyzmetinen málim etkendeı, Aqjaıyq aýdandyq aýrýhanasyna jatqyzylǵan zardap shekkenderdiń ekeýi keshe Oraldaǵy qalalyq kópbeıindi aýrýhananyń neırohırýrgııalyq bólimshesine aýystyryldy. «Sebebi jaraqat alǵandar erekshe kútimdi qajet etedi jáne mamandardyń baqylaýynda bolýy kerek. 23 jáne 46 jastaǵy er adamdardy qazirgi kezde dárigerler otaǵa ázirleýde. Qalǵan eki turǵyn ambýlatorlyq em alýda», - dedi vedomstvodan.
BQO Polıtsııa departamentinen naqtylaǵanyndaı, qazirgi kezde osy oqıǵa boıynsha QR QK-niń 345-baby 3-bóligine sáıkes tergeý amaldary júrgizilýde.
