BQO trassasynda jolaýshylar avtobýsy jyraǵa túsip ketti
ORAL. QazAqparat - Batys Qazaqstan oblysynda 30 adamdy alyp bara jatqan avtobýs jol jıegindegi jyraǵa túsip ketti, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen túsken málimetke qaraǵanda, oqıǵa 22 qańtar kúni saǵat 05.00-de «Oral-Atyraý» jolynyń 76-shaqyrymynda Aqjaıyq aýdany Býdarın aýyly mańynda boldy. DAEWOO markaly avtobýs jyraǵa túsip ketken. Avtobýsta 30 jolaýshy bolǵan, onyń tórteýi - balalar.
Jolaýshylar túgeldeı basqa avtobýsqa otyrǵyzyldy. Zardap shekkender joq.
Sondaı-aq osy kúni saǵat 05.30-da Aqjaıyq aýdany aýmaǵynda «Chapaev-Qaztalov» jolynyń 5-shaqyrymynda jyraǵa qulap ketken «Folksvagen Sharan» kóligi shyǵaryldy.
Aıta keteıik, jyl basynan BQO-da 148 avtokólik qar qursaýynan shyǵarylyp, 204 adam qutqaryldy. 99 adam evakýatsııalandy.
Osy kúnderi aýa raıynyń qolaısyzdyǵyna baılanysty Batys Qazaqstanda avtojoldar jabylýda.
Qazirgi kezde joldardyń barlyǵy ashyq.
