BQO teatrynyń jańa maýsymy «Shyǵystyń sherli mahabbatymen» ashyldy
ORAL. QazAqparat - Batys Qazaqstan oblystyq qazaq drama teatry mereıtoılyq HHV maýsymyn Nazym Hıkmettiń «Shyǵystyń sherli mahabbaty» (aýdarǵan Ábdilda Tájibaev) spektakliniń premerasymen ashty, dep habarlaıdy «QazAqparat» tilshisi.
Qoıylymdy Qazaqstannyń halyq ártisi, Memlekettik syılyqtyń laýreaty, rejısser, professor Tuńǵyshbaı ál-Tarazı sahnalady. Sýretshisi - Murat Mámbetov. Spektakldi teatr ártisteri qos quramda oınaıdy. Basty rolder Farhadty Jylqybaı Jubatov pen Jasqaırat Valıýllıev, Mehmenebanýdy Aqmaral Amandyqova men Nargız Shadyeva somdady. Sondaı-aq Qazaqstannyń eńbek sińirgen qaıratkerleri Erbol Esendosov, Gúljııan Shyntemir, «Daryn» memlekettik jastar syılyǵynyń ıegeri Ásel Mámbetova, QR mádenıet salasynyń úzdigi Temirjan Mataev jáne basqa teatr akterleri oınaıdy.
Aq Jaıyq jurtshylyǵy túrki halyqtarynda «Jeti ǵashyqtyń» biri retinde qurmetteletin Farhad-Shyrynnyń mahabbatyn baıandaıtyn tereń pálsapalyq máni bar qoıylymdy jyly qabyldady. Premera sońynda BQO mádenıet, arhıvter jáne qujattama basqarmasynyń basshysy Qadyrbolat Musaǵalıev kezinde bul qoıylymdy sahnalaýǵa qazir batysqazaqstandyq teatr esimin ıelenip jatqan KSRO halyq ártisi, Memlekettik syılyqtyń laýreaty Hadısha Bókeevanyń atsalysqanyn, Mehmenebanýdy ózi de somdap, halyq súıispenshiligine bólengenin atap ótti. Tuńǵyshbaı ál-Tarazı da jańasha sahnalanǵan bul qoıylymdy bıyl 100 jyldyǵy toılanǵan ataqty aktrısanyń rýhyna arnaıtynyn jetkizdi.
Aıta keteıik, drama oqıǵasy tómendegishe órbıdi. Sińlisin aıyqpas aýrýdan alyp qalý úshin sulýlyǵyn qurbandyqqa shalǵan Shyǵys patshaıymy Mehmenebaný Shyryndaı aıaýlysy ekeýi bir sheberge ǵashyq bolyp qalamyz dep múlde oılaǵan joq. Týǵan sińlisine degen baýyrmaldyq mahabbaty súıgen janyna degen ǵashyqtyǵymen arpalysyp, aıaýsyz azapqa túsken Mehmenebaný Farhad sheberdi asa qıyn synaqqa saldy - adamdar asa muqtaj bolyp otyrǵan ózen sýyn bógegen jartasty joldan alyp tastaýdy shart qyldy. Keń júregine Shyrynyna degen ǵashyqtyǵyn ǵana emes, halqyna degen mahabbatyn da syıǵyza alǵan Farhadqa taq ta, taý da kedergi bola almaıdy. 
