BQO teatrynda Jubannyń 100 jyldyǵyna oraı jańa premera qoıylady
Teatr dırektory Saltanat Ábilǵazıevanyń brıfıngte málim etkenindeı, bul Juban aqynǵa arnalǵan respýblıkadaǵy birinshi qoıylym bolmaq.
«Juban týraly qoıylymǵa daıyndyq bastamas buryn aqynnyń týǵan jeri – Aqjaıyq aýdany, atap aıtqanda, Saıqudyq, Qýraılysaı aýyldaryna sapar shegip keldik.
Juban júrgen joldarmen júrip, aqynnyń beınesin, ómir jolyn jan-jaqty ashýǵa septigin tıgizer derektermen tanystyq, zertteý júrgizdik. Aqyndy biletin adamdarmen tildesip, estelikterin tyńdadyq», dedi teatr dırektory.
Onyń sózine qaraǵanda, qoıylym Memlekettik syılyqtyń laýreaty, aqyn Aqushtap Baqtygereeva men dramatýrg Mádına Omarovanyń týyndysy negizinde «Juban» bir aktili poetıkalyq dramasy janrynda usynylmaqshy.
Spektakldi sahnalaıtyn – H.Bókeeva atyndaǵy oblystyq qazaq drama teatrynyń bas rejısseri, Á.Ómirzaqovanyń týǵanyna 100 jyl tolýyna oraı respýblıkalyq teatrlar festıvaline Ermek Amanshaevtyń «Daýys nemese Daý is» absýrdtyq spektaklimen qatysyp, «Shyǵarmashylyq jetistikteri úshin» nomınatsııasynyń laýreaty atanǵan Gaýhar Adaı (Manǵulova). Qoıýshy jáne kostıým jónindegi sýretshisi – Eýrazııa dızaınerler odaǵynyń, Eýrazııa shyǵarmashylyq gıldııasynyń (London), QR Sýretshiler odaǵynyń jáne Women halyqaralyq uıymynyń múshesi, Kıpr zamanaýı óner mýzeıiniń «Kúmis kilt» ıegeri, Nur-Sultan qalasyndaǵy Jastar teatrynyń sýretshi-dekoratory Gúldana Jurqabaeva.
Jańa qoıylymda bári de jańasha bolmaq. Spektaklge qajetti kostıýmderdiń deni jańadan tigildi.
«Aıta ketý kerek, barlyq karantındik shara qatań saqtalady.
Teatrdaǵy kórermen zaly – 310 oryndyq. Alaıda zal toly kórermen jınalmaıdy. Elimizde qalyptasqan jaǵdaıǵa baılanysty bul qoıylymnyń premerasy azdaǵan adam jınalatyn jabyq kórsetilim formatynda ótedi. Zalda karantındik talapqa saı araqashyqtyq saqtalady.
Medıtsınalyq qorǵanysh quraldary, antıseptıktermen qamtamasyz etý qarastyryldy. Al oblys turǵyndary Juban qoıylymyn «AQJAIYQ» telearnasy arqyly tikeleı efırde nemese montajdalǵan túsirilim nusqasynda kóre alady», dedi S.Ábilǵazıeva.
Bul Gaýhar Adaıdyń oblystyq qazaq drama teatryna bas rejısser bolyp kiriskennen bergi sahnaǵa jol tartatyn alǵashqy qoıylymy bolmaq.
Onyń aıtýynsha, spektakl shovınızm beleń alyp turǵan tusta tutas álemge «Men qazaqpyn!» dep jar salǵan aqyn Jubannyń ómirdastanyn, janynan bir eli qalmaı, asqaq keıpin saqtaýyna sep bolǵan aqynnyń rýhyn sýretteıdi.
«Myń ólip, myń tirilgen» ultymyzdyń tarıhı kezeńi men qoǵam qaıratkeriniń bala jastan dana jasqa deıingi júrip ótken joly egiz óriledi.
«Qoıylym Jubannyń Kolbın aldynda shyńǵyrtyp turyp shyndyq aıtatyn, týǵan halqy úshin ulttyq derjavaǵa qasqaıyp qarsy shyǵatyn jınalys sátinen bastaý alady.
Aqyn boıyna daryǵan batyrlyqtyń bastaýy, ózgelerden oq boıy ozyq turýynyń syry, asqaq rýhynyń túpnegizi balalyq jáne bozbala shaǵymen, eresek ómirmen astasyp sıpattalady», dedi G.Adaı.
Eske sala keteıik, budan buryn Oralda «Jaıyqtyń qos qyrany» atty respýblıkalyq aqyndar aıtysy ótetinin jazǵan bolatynbyz.
