BQO teatrynda «Tozaq sheńberi» dramasynyń premerasy ótti
Jeltoqsan oqıǵasyna arnalǵan, barsha qazaq eliniń júregine jara salǵan azaly kúnderdi arqaý etken spektakldi qoıǵan rejısser Samal Ábýov jańasha sheshim tapqan. Sondaı-aq sýretshi Murat Mámbetov pen baletmeıster Qarlyǵash Qadyrbekovanyń eńbegi mol. Bas keıipker, Halyq qaharmany Qaırat Rysqulbekovtiń rólinde Jasqaırat Valıýllıev oınasa, anasy Dámetkendi Elmıra Maqasheva somdady. Fatıma rolin Aqjan Orynbasarova ashsa, Şerbany Talıǵat Jigerov sátti shyǵardy. Sahna dekoratsııasy utymdy ári spektakl negizinen jastardyń oınaýymen erekshelendi.
Premeraǵa qatysqan oblys ákimi Altaı Kólginov teatr ujymyna rızashylyǵyn bildirdi.
Táýelsizdik merekesi qarsańynda qoıylǵan spektakldiń tusaýkeserine drama avtory Sábıt Dosanov, onyń jary, belgili ǵalym, Qazaqstannyń eńbek sińirgen qaıratkeri Quralaı Aqqoshqarova, jazýshynyń inisi, kásipker Ǵabıt Dosanov, elge tanymal aqyndar Ótegen Oralbaev, Qazybek Isa arnaıy keldi.
Qoıylymǵa S.Dosanov joǵary baǵasyn berip, batysqazaqstandyq teatr ujymyna shynaıy alǵysyn aıtty. Óziniń sózine qaraǵanda, avtor atalmysh týyndyny Jeltoqsan oqıǵasy ótisimen jazǵan. Alaıda ótken ǵasyrda pesany qoıýǵa talpynystar bolǵanymen, kópke deıin sáti túspegen. Kedergiler de bolmaı qalmaǵan. Tek kitapqa basylyp shyqqannan keıin ǵana qyrǵyz teatry alǵash sahnalady. Sodan keıin Ońtústik Qazaqstan oblystyq J.Shanın atyndaǵy akademııalyq qazaq drama teatry qoıdy. Úshinshi bolyp batysqazaqstandyq teatr qolǵa aldy.
«Kez kelgen dramatýrgııalyq týyndynyń mátin kúıindegi nusqasy bir bólek bolsa, sol kórkemdik álemin sahnalyq jandy qozǵalysqa engizý úshin rejısserlik sheshim tabý da ońaı emes. Onyń ústine avtordyń ózi qatysyp otyrsa, jaýapkershilik eki ese arta túseri sózsiz. Qoıýshy rejısser Samal Ábýovtyń izdenisi avtorǵa jáne barsha kórermenge áser etkeni anyq baıqaldy. Jeltoqsan taqyryby - Táýelsiz Qazaqstan úshin máńgilik taqyryp. Bul máseleni qozǵasaq, qaraly da qasiretti jyldardyń elesi sanamyzdy osyp óteri anyq. Jeltoqsan oqıǵasyn búgingi urpaq kórgen joq, biraq osyndaı aqıqatty tý etken qalamgerlerdiń týyndylary arqyly sanamyzǵa sińire tússek, utylmasymyz anyq. Tarıhty umytpaý, ótkennen sabaq alyp, táýbege kelý, Táýelsizdik syndy qasıetti uǵymnyń qadir-qasıetin ulyqtaý osyndaı shynaıy sharalardan bastaý alsa kerek. Rýhanı jańǵyrý úshin shoý jasamaı-aq, osyndaı mándi, maǵynaly dúnıelerdi qoldaý kerek. Teatr ártisteriniń úılesimdi qımyly, sheber oıyndary Jeltoqsan kóterilisiniń lebin anyq sezdirdi. Keı tustarda kózge eriksiz jas keldi. Mysaly, ana bolyp ańyraǵan Elmıra Maqasheva shyqqanda, tereń oıǵa batyrdy. Qoıylymnan keremet áser aldyq», - dedi kórermenderdiń biri, ǵalym Aıdarbek Aqbolatov.
