BQO teatrynda «Muqaǵalı, Nurǵısa» dramasy sahnalandy
ORAL. QazAqparat - H.Bókeeva atyndaǵy oblystyq qazaq drama teatrynda «Muqaǵalı, Nurǵısa» dramasynyń (avtory Nartaı Saýdanbekuly) premerasy boldy, dep habarlaıdy QazAqparat tilshisi.
Qoıylymdy Q.Qýanyshbaev atyndaǵy memlekettik akademııalyq qazaq mýzykalyq drama teatrynyń rejısseri, Qazaqstannyń eńbek sińirgen qaıratkeri Nurlan Jumanııazov sahnalasa, sýretshisi - Murat Mámbetov.
Oqıǵa qazaqtyń birtýar tulǵalary, kompozıtor Nurǵısa Tilendıev pen aqyn Muqaǵalı Maqataevtyń arasynda órbıdi. Muqaǵalıdaı inisiniń qajyp júrgen kezine tap bolǵan Nurǵısa ony úıine ertip ákelip, qamqorlaıdy. Ekeýiniń shyǵarmashylyq baılanysy nátıjesinde máńgi ólmeıtin ánder týady. Arasynda óleń túrindegi monologtarmen, ándermen órnektelip otyratyn drama barysynda qos tulǵanyń shıryqqan sátteri kórinis tapqan. Spektakl Muqaǵalı kompozıtorǵa amanattap ketken «Esińe meni alǵaısyń» óleńine án jazýmen túıindeledi.
Nurǵısany túr-symbaty, qımyl-qozǵalysyna deıin Qazaqstannyń eńbek sińirgen ártisi, Memlekettik syılyqtyń ıegeri Serdesh Qajymuratov keltirse, Muqaǵalıdyń qınalysy men jan tebirenisterin teatrdyń taǵy bir beldi akteri ári kórkemdik jetekshisi, Qazaqstannyń eńbek sińirgen qaıratkeri Erbol Esendosov jetkize bildi. Nurǵısanyń jary Darıǵany Aqmaral Amandyqova somdasa, Salaýat Túmenov aqyn óleńin pir tutatyn mılıtsıoner keıpinde kórindi.
Premerany Aq Jaıyq kórermenderimen birge drama avtory, akter Nartaı Saýdanbekuly, belgili kıno jáne teatr akteri Qýandyq Qystyqbaev tamashalady.
BQO mádenıet basqarmasynyń basshysy Qadyrbolat Musaǵalıev H.Bókeeva atyndaǵy teatrda aqyn-jazýshylar, ánshi-kompozıtorlar ómiri men shyǵarmashylyǵyn arqaý etken qoıylymdardyń aldaǵy ýaqytta da sahnalatynyn jetkizdi.
«Hadısha Bókeeva - meniń ustazym, Almaty memlekettik kórkem sýret ınstıtýtynda akterlik sheberlik jóninde sol kisiden dáris alǵanmyn. Onyń ústine ózim Batys Qazaqstan oblysynan túlep ushtym, sondyqtan Hadısha Bókeeva teatry men úshin aıryqsha ystyq. Munda Memlekettik syılyqtyń ıegeri Serdesh Qajymuratovtaı aǵa býyn ókilderi bastaǵan urpaqtar sabaqtastyǵy keremet úılesim tapqan. Sondyqtan teatr ujymy qandaı dúnıeni de alyp shyǵa alady. Buǵan deıin Oralda amerıkalyq dramatýrg Vına Delmardyń «Baıansyz baq» dramasy men Shyńǵys Aıtmatovtyń «Aq kemesin» sahnalasam, bul - úshinshi týyndym. Eń bastysy, eldiń kóńilinen shyqsa, odan artyq baǵa joq», dedi QazAqparat tilshisine Q.Qýanyshbaev atyndaǵy memlekettik akademııalyq qazaq mýzykalyq drama teatrynyń rejısseri Nurlan Jumanııazov.
Eske sala keteıik, budan buryn H.Bókeeva atyndaǵy BQO teatrynyń jańa maýsymy Iran-Ǵaıyptyń «Abaı» («Men ishpegen ý bar ma?..») rekvıemimen ashylǵanyn jazǵan bolatynbyz.
