BQO teatrynda «Qysylǵannan qyz boldyq» komedııasy sahnalandy
ORAL. QazAqparat - H.Bókeeva atyndaǵy oblystyq qazaq drama teatrynda belgili jazýshy-dramatýrg Sáken Júnisovtiń shyǵarmasy boıynsha qoıylǵan «Qysylǵannan qyz boldyq» komedııasy sahnalandy, dep habarlaıdy QazAqparat tilshisi.
Spektaldi qoıǵan teatrdyń bas rejısseri mindetin atqarýshy Samal Ábýov bolsa, sýretshisi - Murat Mámbetov.
Oqıǵanyń negizgi jelisi aýylda ótedi. Astanadaǵy festıvalǵa qatysý úshin qyzdar ansamblin qurý kerek bolady. Onyń jetekshisi mal dárigeri Jumat (ártis Asyljan Jakın) bolsa, aýylda qyzdar jetispegendikten, polıtsııa qyzmetkeri Altynbekke (Raıymbek Ermek) Altyn atanyp, «qysylǵannan qyz bolýǵa» týra keledi. Tipti jasy birazǵa kelip qalǵan aspaz Sábıra (Elmıra Maqasheva) da ansamblge qosylady. Aýyl ákimi Ybyraı (Dýlat Hamıtov) qyzdardyń abyroı bıiginen kórinýi úshin ansambl músheleriniń sábılerin baǵýǵa beıil. Kórermenderdi kúlkige bólep, birte-birte shıraı túsetin oqıǵa barysynda qalalyq kompozıtor, festıvaldiń qazylar alqasynyń múshesi, anasynyń aıtýymen endi úılengeli júrgen Edige-Edık (Rınat Sabyrǵalıev) qyz bolyp kıingen Altynbekke ǵashyq bolyp qalady. Spektakl qyzdar ansambliniń festıval jeńimpazy atanýymen aıaqtalady.
«Pesa ótken ǵasyrdyń jetpisinshi jyldary jaryq kórgen. Erterekte jıi sahnalanǵanmen, sońǵy kezde qoıylmaı ketken edi. Onyń ústine shyǵarma keńes dáýirinde jazylǵandyqtan, Almatyny Astana, keńshar dırektoryn aýyl ákimi dep ózgertýge týra keldi. Jalpy, spektakldi qoıýdaǵy maqsat - «Rýhanı jańǵyrý» aıasynda «El ishi - óner kenishi» ekendigin, talanttardyń aýylda ósip-ónetindigin kórsetý. Qarapaıym mamandyq ıeleriniń arasynda talaptylar az emes. Olardyń ónerin tek ushtaı bilý kerek. Jalpy, árkim óziniń aldyna bıik maqsat qoısa, oǵan jete alady. Muny, ásirese, jastar bile júrse, artyq bolmaıdy. Qoıylymda teatr akterlary qos quramda oınaıdy», dedi «QazAqparat» tilshisine rejısser Samal Ábýov.
Premerany tamashalaǵan S.Ábýovtiń ustazy, sala ardageri, Qazaqstannyń eńbek sińirgen mádenıet qyzmetkeri Aıman Qýatova shákirtiniń rejısser retindegi sheberlik deńgeıi ósip kele jatqandyǵyn jetkizdi.
