BQO teatrynda «Qysqa ǵumyr» muńdy komedııasy qoıyldy

Atalmysh týyndyny qazaq tiline teatr aktrısasy Elmıra Maqasheva aýdarsa, qoıylymdy akter ári rejısser Samal Ábýov sahnalady. Sýretshisi - Murat Mámbetov. Oqıǵa negizinen tósek tartyp jatqan shal men onyń kempiri arasynda órbıdi. Túsine ajal  enip, óziniń dám-tuzy taýsylýyna úsh saǵat qalǵanyn bilgen shalǵa osy merzimde saýapty is qylýǵa «tapsyrma beriledi». Saýapty is qylsa, ǵumyry da uzarmaq. Sondyqtan kempiri ekeýi qandaı saýapty is tyndyrý kerektigin aqyldasa otyryp, ótken ómirlerin kóz aldynan ótkizedi. Olardyń jas kezindegi beıneleri Grıgorıı men Vasılısa keıpinde kórinedi. Óz jarynyń qadirin bilmeı, kózine shóp salǵan Grıgorıı, perzent súıe almaı, pushaıman bolǵan áıel arasyndaǵy tartys qartaıǵan kezde de bitpeıdi. Bir-birine degen qyzǵanyshyn jasyra almaǵanmen, qımastyq ta aıqyn baıqalyp turady.  Týyndy qansha ókpe-renish bolsa da, adam keshire bilip, bir-birimen syılasa bilýden artyq eshteńe joqtyǵyn uǵyndyra túsedi, oı saldyrady. Salaýat Túmenov, Qazaqstannyń eńbek sińirgen qaıratkeri Baqytgúl Jaqypova, Jasqaırat Valıýllıev, Juldyz Mamedova syndy teatr ártisteri oınaıtyn spektakl kórermenderdi beı-jaı qaldyrmaıdy.
 

Aıta keteıik, Florıd Býlıakov (1948-2015) - Bashqurt Respýblıkasynyń halyq jazýshysy, Reseı Memlekettik jáne Salaýat ıÝlaev atyndaǵy Bashqurt Memlekettik syılyǵynyń ıegeri, Bashqurtstannyń eńbek sińirgen óner qaıratkeri. Jıyrmaǵa jýyq pesa jazǵan onyń týyndylary Reseı men jaqyn shet elderdiń 150-den astam teatrlarynda qoıylyp keledi. Florıd Býlıakov kıno salasynda da jemisti eńbek etip, bashqurt eliniń birinshi kásibı kınodramatýrgy atandy.  Úsh kınoroman, toǵyz kınokomedııa jazǵan ol -  50 serııadan turatyn «Aıdyń qyzy» alǵashqy bashqurt serıalynyń  avtory. Sonymen qatar «Mahabbat juldyzy» (kompozıtory Salaýat Nızametdınov) atty birinshi bashqurt rok-operasyn da jazdy.

F.Býlıakovtyń týyndysy BQO teatrynda alǵash ret qoıylyp otyr.