BQO teatryna Hadısha Bókeevanyń esimi berilmek
ORAL. QazAqparat - Búgin oblystyq máslıhattyń kezekti 9-sessııasynda depýtattar Batys Qazaqstan oblystyq qazaq drama teatryna ataqty sahna sańlaǵy, bıyl týǵanyna týra bir ǵasyr tolǵan KSRO jáne Qazaqstannyń halyq ártisi Hadısha Bókeevanyń esimin berý týraly usynysty maquldady, dep habarlaıdy «QazAqparat» HAA tilshisi.
Sonymen qatar oblystyq mádenıet jáne óner ortalyǵyna aqıyq aqyn, Qazaqstannyń halyq jazýshysy Qadyr Myrza Álıdiń, Oral qalasyndaǵy №30 orta mektepke qazaqtyń tuńǵysh ushqysh qyzy, Halyq qaharmany Hıýaz Dospanovanyń, Syrym aýdandyq ortalyqtandyrylǵan kitaphana júıesine jazýshy, halyqaralyq «Alash» ádebı syılyǵynyń ıegeri Muqades Eslamǵalıulynyń esimderin berý týraly usynys ta qoldaý tapty.
«Biz endi BQO ákimdigi men oblystyq máslıhattyń birlesken sheshimin respýblıkalyq onomastıka komıssııasyna jiberemiz. Respýblıkalyq komıssııa qoldasa, Úkimet qaýlysymen atalǵan mekemelerge elimizge tanymal tulǵalardyń esimderi beriledi», dedi «QazAqparat» tilshisine oblystyq máslıhat hatshysy Málik Qulshar.
Aıta keteıik, sessııada 2017 jylǵa arnalǵan oblystyq bıýdjet 12,9 mlrd. teńgege ulǵaıtyldy. Oblystyq ekonomıka jáne bıýdjettik josparlaý basqarmasynyń basshysy Qaısar Mańqaraevtyń málim etkenindeı, densaýlyq saqtaý salasyna 525,3 mln. teńge (sonyń ishinde Zelenov, Qaratóbe, Terekti aýdandaryndaǵy 3 nysandy kúrdeli jóndeý jumystaryn aıaqtaýǵa), bilim salasyna 1788,4 mln. teńge (sonyń ishinde Aqjaıyq, Qaztalov, Syrym, Terekti aýdandarynda 4 bilim nysanyn kúrdeli jóndeýge jáne salynyp jatqan 2 bilim nysanynyń qurylysyn qosa qarjylandyrýǵa), mádenıet salasyna 548 mln. teńge (sonyń ishinde 5 nysandy kúrdeli jóndeýge), áleýmettik qorǵaý jáne áleýmettik qamsyzdandyrý salasyna 151,9 mln. teńge, aýyl sharýashylyǵy jáne qorshaǵan ortany qorǵaý salasyna 227 mln. teńge (sonyń ishinde 3 qorshaǵan ortany qorǵaý nysandarynyń qurylysyn bastaýǵa jáne qaıta qurýǵa), gazben jabdyqtaýǵa 179,4 mln. teńge (mysaly, Qaratóbe jáne Syrym aýdandaryndaǵy 12 áleýmettik nysandy gazben jabdyqtaýǵa, Jańaqala, Bókeı ordasy, Syrym aýdandarynda 9 nysannyń jobalyq-smetalyq qujattamasyn daıyndaýǵa), joldardy jóndeýge 1189,2 mln. teńge (sonyń ishinde Aqjaıyq, Jańaqala, Zelenov, Qaztalov, Shyńǵyrlaý, Tasqala aýdandarynda aýylishilik jáne Oral qalasynda qalaishilik avtojoldardy ortasha jáne kúrdeli jóndeý jumystaryn bastaýǵa, sonymen qatar Syrym aýdanynyń 2 aýylishilik joldardy salýǵa), turǵyn úı qurylysyna 2453,7 mln. teńge (sonyń ishinde Oral qalasynda jáne Bórli aýdanynyń Aqsaı qalasynda 4 nesıelik turǵyn úı qurylysyn aıaqtaýǵa) qaraldy. Atalǵan ózgeristerdi eskergende, oblystyq bıýdjet kirister men shyǵyndar boıynsha 124,2 mlrd. teńgege jetti.
