BQO teatry jańa qoıylymyn Farıza aqynǵa arnady
ORAL. QazAqparat - H.Bókeeva atyndaǵy oblystyq qazaq drama teatrynda «Aıalap ótem...» atty jańa qoıylymnyń premerasy boldy, dep habarlaıdy QazAqparat tilshisi.
Belgili aqyn, Qazaqstannyń halyq jazýshysy, Memlekettik syılyqtyń ıegeri Farıza Ońǵarsynovanyń shyǵarmashylyǵyna arnalǵan týyndynyń janryn avtorlar Nurlan Sádir men Nurlygúl Jubatova poetıkalyq fentezı dep belgilegen eken.
Tusaýkeseri Halyqaralyq áıelder kúni merekesimen tuspa-tus kelgen qoıylymdy mádenıet salasynyń úzdigi Nurlygúl Jubatova sahnalasa, sýretshisi - Murat Mámbetov.
Basty rolde Qazaqstannyń eńbek sińirgen qaıratkeri Gúljııan Shyntemir oınady (Farızanyń beınesin ekinshi quramda sondaı-aq N.Jubatovanyń ózi de somdaıdy). Spektaklge teatrdyń jas ártisteri de belsene atsalysty.
Qoıylym «Óleń, men seni aıalap ótem...» dep ótken aqynnyń Mahambet rýhymen úndes órshil poezııasyn, arman-ańsaryn, jastarǵa berer taǵylymyn kórsetýdi maqsat tutqan. Sonymen qatar qazirgi qoǵamnyń tolǵaqty máselesine arnalǵan ana men bala problemasy da aıtylyp qalady. Eń bastysy, qazaq poezııasynyń máńgi alasarmas bir shyńyna aınalyp úlgergen Farıza Ońǵarsynovaǵa teatr tórinen taǵy bir qurmet kórsetildi.
H.Bókeeva atyndaǵy qazaq teatry sońǵy kezde aqyn-jazýshylardyń, kompozıtorlar men óner qaıratkerleriniń shyǵarmashylyǵyna arnalǵan týyndylardy da qoıyp keledi.
Eske sala keteıik, budan buryn teatrdyń aqyn Muqaǵalı Maqataevtyń «Qosh, mahabbat» atty shyǵarmasy boıynsha spektakl qoıǵanyn jazǵan bolatynbyz.
