BQO teatrlaryn jaraqtandyrýǵa 100 mln teńge jumsalmaq
ORAL. QazAqparat - Aldaǵy jyly Batys Qazaqstan oblysy teatrlaryn jaraqtandyrý, sahnalaryn bezendirý jáne jańa kıim-keshek alýǵa 100 mln teńge jumsalmaq. Bul týraly mádenıet salasynyń qyzmetkerlerimen kezdesip, olardy Táýelsizdiktiń 25 jyldyǵymen jáne jańa jyl merekesimen quttyqtaǵan oblys ákimi Altaı Kólginov málim etti, dep habarlaıdy «QazAqparat» HAA tilshisi.
Óńir basshysynyń atap ótkenindeı, táýelsizdik jyldary mádenıet jáne óner salasynda da kóptegen ózgeris-jańalyqtar boldy. Jańadan nysandar salynyp, mamandardyń kásibı deńgeıi artty. Sonyń ishinde aýyl mádenıetiniń ósip-órkendegenin, ondaǵy ónerpazdardyń sheberligi ushtala túskendigin anyq ańǵarýǵa bolady. Kópten jóndelmegen aýyldyq klýbtar men mádenıet úıleri, kitaphanalar retke keltirilýde. Mysaly, qazirgi tańda 600 mln. jýyq teńgege 28 mádenıet nysany kúrdeli jáne aǵymdaǵy jóndeýden ótkizilýde. Budan keıingi kezek teatrlarǵa kelmekshi. Oralda Batys Qazaqstan oblystyq qazaq drama teatry men A.Ostrovskıı atyndaǵy orys drama teatry bolsa, aýdandarda halyq teatrlary bar. Mine, solardyń da zaman talabyna saı jańǵyrtylýy úshin qajetti kómek-qoldaý kórsetiletin bolady. Elbasynyń tapsyrmasyna sáıkes el birligi men yntymaǵyn arttyrý baǵytyndaǵy túrli sharalardy uıymdastyrýǵa budan bylaı da sala qyzmetkerleri súbeli úlesterin qosatyny anyq.
Jıyn barysynda Altaı Kólginov Táýelsizdiktiń 25 jyldyǵyna oraı Elbasy Jarlyǵymen marapattalǵan elge tanymal dástúrli ánshi, Ǵ.Qurmanǵalıev atyndaǵy oblystyq fılarmonııa solısi Dastan Esentemirovke «Eren eńbegi úshin» medalin tabys etti. Sondaı-aq Syrym jáne Shyńǵyrlaý aýdandyq ortalyqtandyrylǵan kitaphana júıesiniń dırektorlary Raýshan Hasanova men Gúlsim Qýanaeva, Terekti aýdany Fedorov aýyldyq ortalyqtandyrylǵan kitaphana júıesiniń dırektory Marına Lýkmanova, Qurmanǵazy atyndaǵy mýzyka kolledji halyq aspaptar bóliminiń meńgerýshisi Asylǵanym Qusmaǵambetovaǵa «Mádenıet salasynyń úzdigi» tósbelgisi tapsyryldy. Taǵy birqatary oblys ákimi men QR Mádenıet jáne sport mınıstriniń alǵyshattaryna, basqa da marapattarǵa ıe boldy.
