BQO: Tasqynnan zardap shekkenderge baspana salý jumystary bastalyp ketti
ORAL. KAZINFORM – Tasqyn sýdyń beti qaıtqan soń, onyń zardabymen kúresý, shyǵyndy qalpyna keltirý jumystary júrýde.
Podstepnyı aýyldyq okrýginde zardap shekken turǵyndarǵa kezeń-kezeńimen kómek berý júzege asýda.
Qazir halyqqa keregi — baspana. Ár jaqta tentiregen turǵyndardyń talaby da sol, tezirek baspanaly bolsaq degen tilekteri bar.
Memleket basshysy Qasym-Jomart Kemeluly: «Tasqyn sýdan zardap shekken azamattarǵa aıtarym, memleket birde-bir adamdy eskerýsiz qaldyrmaıdy. Barshańyzǵa qarjylyq jáne basqa da kómek beriledi. Materıaldyq shyǵyndar tolyq óteledi» dep birqatar tapsyrmalar bergen bolatyn. Qazirgi tańda komıssııa sheshimimen apatty dep tanylǵan úıler qulatylyp, ornyna jańa úı salý jumystary bastaldy. Sondaı-aq ishki árleý jumysyn qajet etetin úıler bar. Onyń bárin qalpyna keltirý ýaqytty talap etedi.
Sol tapsyrmalarǵa sáıkes Podstepnyı aýyldyq okrýginde turýǵa jaramsyz dep tanylǵan 98 úı buzylatyn boldy. Ornyna 80 sharshy metrdi quraıtyn jańa úıler salynady. Qazirgi ýaqytta atalmysh aýylda qurylys qarqyn ala bastady.
Turǵyn úı salý jumystaryn «Otdelstroı», «SVS Batys», «Atameken Invest», «CHRYSTAL GENERATION LTD», «GradIndQurylys», «BETA Servicom», «Batys Kurylys Servicom» syndy birneshe qurylys kompanııalary júrgizedi.
Aýdan ákimi Álııa Muhanbetjanova merdigerlermen kezdesip, turǵyn úı qurylysy barysymen tanysty. Qurylys basynda bolyp, Podstepnyı aýyly turǵandyrymen tildesken bolatynbyz. Ol jandardyń ishinde raqmet aıtyp jatqandary da, kóńili tolmaı, jasalyp jatqan jumystardy joqqa shyǵaryp jatqandary da bar. Árıne, bárine birdeı unaý múmkin emes.
Solardyń biri Podstepnyı aýylyna qonys tepkenine jıyrma jylǵa jýyq ýaqyt bolǵan Neǵmetolla Jalmuratovtyń úıi de apatty dep tanylǵan.
- Naýryz aıynyń sońynda turǵyn úıimiz sýǵa ketti. Komıssııa sheshimimen úıdi buzyp, ornyna jańa úı salyp beretinin aıtty. Qazir jerdi tegistep jatyr. Bir-eki kúnde úı irgesi quıylady. Alla qalasa, kúzde jańa baspanamyzǵa kiremiz degen oıymyz bar.
Qazirgi ýaqytta qurylys qarqyny jaqsy. Merdigerler kúzge deıin úıdi tolyq aıaqtap, kiltin tabystaımyz dep otyr.
