BQO: sý tasqynynan zardap shekken 9671 otbasyna kómek berildi

ORAL. KAZINFORM - Búginde Batys Qazaqstan oblysy boıynsha sý tasqynynan zardap shekken 9671 otbasyna 3 mlrd 570 mln teńge kóleminde bir jolǵy áleýmettik kómek berildi, dep habarlaıdy oblystyq ákimdikiń baspasóz qyzmeti. 

Qazirgi ýaqytta turǵyndarǵa 150 aılyq eseptik kórsetkish kólemindegi áleýmettik tólemderdi berý jumystary jalǵasýda. Búginde 1 myńǵa jýyq otbasy atalǵan áleýmettik kómekti aldy.

Sý tasqynynan zardap shekken 5 aýdannyń turǵyndary úshin 401 úıdiń qurylysy júrip jatyr. Tıisti merdiger kompanııalar anyqtaldy.

«Memleket basshysynyń tapsyrmasy aıasynda sý tasqynynan zardap shekken turǵyndarǵa jan-jaqty qoldaý kórsetilýde. Turǵyn úıleri jaramsyz bolǵan 3 aýdan boıynsha úı satyp alýǵa 79 ótinish túsken. Búgingi kúnge deıin atalǵan aýdandar boıynsha 567 mln teńgege 27 úı satyp alyndy. Satyp alý jumystary jalǵasady. Qurylys jumystarynyń sapasy men ýaqytyly aıaqtalýyn da tikeleı baqylaýda ustap otyrmyz», - dedi oblys ákimi Narıman Tóreǵalıev.

Budan bólek, Oral qalasyndaǵy saıajaı turǵyndary tarapynan týyndaıtyn quqyqtyq máseleler boıynsha arnaıy jedel top jumys isteýde.

Qazirgi ýakytta saıajaılardaǵy shyǵyndardy esepteý jónindegi komıssııa shtattyq rejımde jumys istep, baǵalaý jumystaryn júrgizýde.