BQO soty men kásipkerler palatasy memorandýmǵa qol qoıdy
ORAL. QazAqparat - Dostyq úıinde BQO soty men óńirlik kásipkerler palatasy kásipkerler quqyqtaryn qorǵaý salasyndaǵy ekijaqty yntymaqtastyq jónindegi memorandýmǵa qol qoıdy, dep habarlaıdy «QazAqparat» tilshisi.
Jıynǵa qatysqan oblys ákiminiń birinshi orynbasary Arman Óteǵulov elimizde kásipkerlikti damytýda memleket tarapynan úlken qoldaý kórsetilip kele jatqanyn jetkizdi. Osy oraıda kásipkerlerdiń quqyqtyq jaǵynan qorǵalýynyń mańyzy erekshe. Elbasy tapsyrmasyna sáıkes shaǵyn jáne orta bıznesti túbegeıli jaqsartý men keńeıtý baǵytynda naqty sharalar qolǵa alynyp, 2050 jylǵa deıin ishki jalpy ónimniń paıyzdyq deńgeıin 50 paıyzǵa deıin jetkizý mindeti qoıylǵany belgili. Bul rette Batys Qazaqstan oblysynda da kásipkerlik kókjıegi keńeıe túsýde. Qazirgi tańda 48 myńdaı shaǵyn jáne orta bıznes nysandarynda 120 myńdaı adam eńbek etýde. Óńir basshysy Altaı Kólginov aı saıyn kásipkerlerdi kókeıkesti máseleleri boıynsha qabyldap, olardyń ońtaıly sheshilýine naqty yqpal etilýde. Sońǵy kezde aýyl sharýashylyǵy kooperatıvteri qurylyp, olarǵa memleket tarapynan qoldaý kórsetilýde. Qazirgi tańda alty myńdaı turǵyn jumys jasaıtyn kooperatıvter sany 180-ge jetti.
Basqosýda BQO sotynyń tóraǵasy Bek Ámetov kásipkerler quqyǵyn qorǵaý isinde sot júıesiniń mańyzdy ról atqaratyndyǵyn atap ótti. Elbasynyń «Qazaqstan - 2050» strategııasynda kórsetilgenindeı, kásipkerlerdiń, ınvestorlardyń quqyqtary men zańdy múddelerin qorǵaýda sot júıesi basty oryn alady. Bul rette aýdanaralyq ekonomıkalyq sottardyń jumysyn jetildirýmen birge ózara yntymaqtastyq aıasynda kásipkerler palatasy kásipkerlerdiń quqyqtyq saýattylyǵyn arttyrý baǵytynda jáne bıliktiń bir tarmaǵy retinde sottardyń táýelsizdigi jóninde aqparattyq túsinik jumystaryn júrgizýi kerek. 
BQO mamandandyrylǵan aýdanaralyq ekonomıkalyq sotynyń tóraǵasy Isataı Smatovtyń sózine qaraǵanda, kásipkerlerdiń quqyqtaryn kóbinese atqarýshy jáne baqylaýshy qurylymdar buzady. Onyń ishinde zańsyz mindetterdi júkteý, salyq jáne quqyq qorǵaý qurylymdary tarapynan bolatyn tekserister, túrli qujattar alýdaǵy sózbuıdaǵa salýshylyq bar. Munyń bári kásipkerlerdiń qalypty jumysyna kedergi bolady.
Bek Ámetov pen óńirlik kásipkerler palatasynyń dırektory Nurlan Qaıyrshın qol qoıǵan memorandýmǵa sáıkes atalmysh palata ókilderiniń sot aqparattaryna qoljetimdiligi qamtamasyz etiledi. Basty tórt baǵyt boıynsha: kásipkerlerdiń quqyqtary men zańdy múddelerin kózdeıtin zańdylyqtardy jetildirý, kásipkerlik ókilderiniń qatysymen ótetin sot isterin qaraýda kásipkerlik sýbektilerin uıymdastyrý, quqyqtyq jaǵynan qamtamasyz etý, ekonomıkalyq sıpattaǵy daýlardy qaraýdyń balamaly jáne sotqa deıingi formalaryn qoldaný jáne uıymdastyrýda ádistemelik, quqyqtyq kómek kórsetý, kásipkerlerdi sot júıesiniń qyzmeti jóninde aqparattaný deńgeıin kóterý boıynsha áriptestik damıtyn bolady.
