BQO sottary tatýlastyrý arqyly 170 isti toqtatty
ORAL. QazAqparat - Batys Qazaqstan oblysynyń sottary jyl basynan beri tatýlasý rásimderin qoldaný arqyly 170 azamattyq isti toqtatty, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, júzbe-júz sóılesý arqyly ymyraǵa kelý daýlasýshylardyń ózara tıimdi sheshim qabyldaýyna kómektesti.
Sonyń nátıjesinde 25 tatýlasý kelisimi, 144 medıatıvtik jáne daýdy partısıpatıvtik protsedýra tártibimen retteý týraly 1 kelisim jasaldy.
Mysaly, Tasqala aýdandyq sotynda erkin jaıylysta júrgen 4 jylqynyń joǵalyp ketýi saldarynan keltirilgen 1,4 mln teńge materıaldyq zalaldy óndirip alý jónindegi daý retteldi. Áńgimelesý barysynda taraptar medıatıvtik kelisim jasaýǵa kelisti, sol boıynsha jaýapker maldy qaıtaryp berýge mindettendi, al talapker qoıǵan talaptarynan bas tartty.
Osyǵan uqsas daý Qaztalov aýdanynyń №2 sotynda da sheshimin tapty. Jaýapkerdiń kinási boıynsha talapkerdiń 10 qoı men 7 bas iri qaradan aıyrylyp qalǵany anyqtaldy. Talapker 1,7 mln teńgeniń óndirilýin talap etti. Sot otyrysynda taraptar ózara tıimdi sheshim qabyldaı otyryp kelisimge keldi.
Naq sol sotta jaýapkerdiń qorlaýy jáne ınternette beınejazbany taratyp jiberýi saldarynan keltirilgen moraldyq zııan úshin 1 mln teńge óndirip alý týraly is boıynsha da kelisim jasaldy. Sot taraptar qol qoıǵan medıatıvtik kelisimdi bekitti, is toqtatyldy.
Sonymen qatar kóptegen azamattyq ister Oral qalalyq №2 sotynyń qaraýynda jatyr. Bulardyń sany kún saıyn kóbeıýde. Máselen, bıylǵy 3 qańtardan 1 aqpanǵa deıingi merzimde alımentterdi, aqsha zaımdaryn óndirip alý týraly, nekeni buzý, múlikti bólý, zalaldy óteý, sharttyq mindettemeler men eńbek daýlary boıynsha sýdıa-tatýlastyrýshylarǵa 192 aryz tústi. Janjalǵa qatysýshylardyń kelissózge kelýi, problemalar men kelispeýshilikterdi túsine bilýi taraptardyń daýdy sheshýdiń tıimdi jolyn tańdap alýyna septesti. Nátıjesinde sýdıalar 17 tatýlasý, 80 medıatıvtik kelisimin bekitti.
Eske sala keteıik, budan buryn BQO-da elimizde alǵashqy bolyp bıler keńesi týraly ereje qabyldanǵanyn jazǵan bolatynbyz.
