BQO sottary elektrondy sot isin júrgizýge kóshýde
ORAL. QazAqparat - 20 qyrkúıekten bastap BQO sottaryna «Elektrondy qylmystyq is» pılottyq jobasy engizilmek. Bul týraly búgin óńirlik kommýnıkatsııalar qyzmetiniń alańynda BQO sotynyń tóraǵasy Bek Ámetov málim etti, dep habarlaıdy «QazAqparat» tilshisi.
Brıfıngte B.Ámetovtiń atap ótkenindeı, qazirgi tańda elektrondy úkimet qurý memlekettiń asa mańyzdy tapsyrmalarynyń biri bolyp otyr. Osyǵan oraı sot júıesi de bıliktiń bir tarmaǵy retinde elektrondy qujat aınalymyn engizý arqyly elektrondy sot isin júrgizýge birtindep kóshýge bet burdy. Sot júıesindegi aqparattyq tehnologııalar sot tóreliginiń tıimdiligin arttyryp, is júrgizýdiń ashyqtyǵy men jarııalylyǵyn qamtamasyz etip, azamattardyń sotqa senimdiligin nyǵaıtatyny anyq. Mysaly, qazirdiń ózinde aqparattyq tehnologııany qoldana otyryp, aryzdy berý jáne tirkeý satysynan bastap zańdy kúshine engen sot buıryǵyn oryndaýǵa joldaýǵa deıingi azamattyq isterdiń jańa tártipte qaralýy qaǵazbastylyqty qysqartýǵa, sot júıesindegi júktemeni azaıtýǵa múmkindik berdi. Bıylǵy 17 shildeden beri oblys sottary 1028 aryzdyń elektrondy nusqada qaralýyn qamtamasyz etti.
Sonymen qatar 20 qyrkúıekten bastap «Elektrondy qylmystyq is» jobasymen birge «Jazany taǵaıyndaý» pılottyq taldaý qyzmetiniń engizilýi qylmystyq is júrgizýdiń ashyqtyǵyn arttyryp, qaǵaz júzindegi qujat aınalymyna ketetin shyǵyndy kemitedi.
Sol sekildi Joǵarǵy Sot Aqparat jáne kommýnıkatsııalar mınıstrligi, «Azamattarǵa arnalǵan úkimet» memlekettik korporatsııasymen birlesip júzege asyryp jatqan pılottyq joba aıasynda elektrondy sot isin damytý men sot tóreligine qoljetimdilikti arttyrý maqsatynda Oral qalasynyń №2 soty men mamandandyrylǵan aýdanaralyq ekonomıkalyq sotynda halyqqa qyzmet kórsetý ortalyǵynyń bólimsheleri ashyldy. Onda azamattarǵa elektrondy sandy qoltańba berý jáne sot organdarynyń elektrondy qyzmetine qol jetkizetin memlekettik qyzmet kórsetiledi. Sot tarapynan «Sot kabıneti» arqyly elektrondy aryzdardy joldaý jáne elektrondy qyzmetke baılanysty basqa da kómekter kórsetilýde. BQO sottarynda «Sot kabıneti» qyzmeti iske qosylǵannan beri 2 200 106 aryz kelip túsken.
