BQO sottary tsıfrlyq tehnologııalarǵa kóshti
Óńirlik kommýnıkatsııalar qyzmeti alańynda BQO sottar ákimshisi Nurlan Qajǵanovtyń málim etkenindeı, sot júıesi bıliktiń bir tarmaǵy retinde elektrondy qujat aınalymyn engizip, elektrondy sot isin júrgizýge kóshýde. Azamattyq, qylmystyq jáne ákimshilik sot isin júrgizýde qoldanyla bastaǵan dybys-beınejazba qurylǵysy sot júıesiniń ashyqtyǵy men qoljetimdiligin qamtamasyz etedi.
Búgingi tańda oblysta 69 sot májilisi zaly (100 paıyz) dybys-beınejazba quraldarymen jabdyqtalǵan. 2017 jyly taǵaıyndalǵan 49 623 sot májilisiniń barlyǵy dybys-beınejazba quralyn qoldaný arqyly ótken. Oblystyń barlyq sottaryna ornatylǵan beınekonferentsbaılanys júıesi aýmaqtyq jáne aýdandyq sottar aralaryndaǵy dıstantsııalyq oqytýǵa, semınarlardy ótkizýge, qashyqtyqtan qatynasý tásilimen sot tóreligin júzege asyrýǵa zor múmkindik beredi. Ótken jyly osy júıe arqyly onlaın rejımde qylmystyq-atqarý júıesi departamentinen kelip túsken 622 materıal qaraldy.
Buıryq arqyly sot isin júrgizýge arnalǵan elektrondyq servıs te - sot júıesindegi tıimdi quraldardyń biri. Ol aryzdy berý jáne tirkeý satysynan bastap, zańdy kúshine engen sot aktisin oryndaýǵa jibergenge deıingi qaraýdyń jańa tártibi sot isin júrgizýdi edáýir qysqartyp, sot júıesine júktemeni tómendetýge septigin tıgizdi. Ótken jyldyń 17 shildesinen bastap sottar 6055 aryzdy elektrondyq tásilmen qarady.
Elimizde 2017 jyldyń 20 qyrkúıeginen bastap «Elektrondyq qylmystyq is» pılottyq jobasy men «Jazany taǵaıyndaý» pılottyq taldaý servısi iske qosyldy. Olar qylmystyq protsestiń ashyqtyǵyn joǵarylatyp, qaǵaz qujat aınalymyna shyǵyndardy tómendetti.
Jyldan-jylǵa Qazaqstanda sotta qaralǵan ister sany artýda. Onyń sanyn medıatsııa qysqartýy tıis. 2017 jylǵy 28 qarashada «Tsıfrlyq Qazaqstan» memlekettik baǵdarlamasy aıasynda Batys Qazaqstan oblystyq soty men oblys ákimdiginiń «Tsıfrlyq tehnologııalar arqyly medıatsııaǵa qol jetkizý» birlesken pılottyq jobasy tanystyryldy. Joba azamattardyń medıatorlardyń qyzmetine júginýin yńǵaıly etýge baǵyttalǵan. Ońaılatylǵan joba azamattardyń áýre-sarsańǵa túspeýin qamtamasyz etip, quqyq qorǵaý organdarynyń jumysyn azaıtady. Elektrondyq servıs №1 HQKO-da iske qosyldy.
«Jobanyń ekinshi kezeńi 2018 jyldan bastap engizilmek. Servıs barlyq azamattarǵa qoljetimdi bolyp, ol úshin arnaıy portal qurylatyn bolady. Servısti paıdalanýshy silteme boıynsha kirip, medıatsııa týraly materıaldarmen tanysyp, medıatorlardyń tizimin, jumys kestesin, pikirlerdi, medıatordyń jumys tájirıbesin jáne t.b. málimetterdi qaraı alady. Servıs mobıldi qosymshada qoljetimdi, ony kóshirip alýǵa jáne derbes gadjetter men smartfondarǵa ornatýǵa bolady», dedi N.Qajǵanov.
Brıfıngte sondaı-aq BQO sotynyń tóraǵasy Bek Ámetov ótken jyly oblys sottarynda qaralǵan qylmystyq, azamattyq jáne ákimshilik isterge toqtaldy.