BQO sotynda bopsalaýmen aınalysqan uıymdasqan toptyń isi qaralyp jatyr
ORAL. KAZINFORM — BQO qylmystyq ister jónindegi mamandandyrylǵan aýdanaralyq sotynda bopsalaýshylarǵa qatysty basty sot talqysy bastaldy.
Memlekettik aıyptaý tarabynyń málimetine sáıkes uıymdasqan qylmystyq topqa BQO sambo federatsııasynyń tóraǵasy Talǵat Shaıhıev basshylyq etken. Sondaı-aq Batyrgereı Bısenǵalıev, Aslanbek Ihlasov, Altynbek Súleımenov, Sabyrjan Balmuhambetov, Dáýren Bekmýldın, Elaman Ermekqalı jáne Jumaǵulovqa Qylmystyq istiń birneshe baby boıynsha aıyp taǵyldy.
Prokýror Dosbol Jumanovtyń sózine qaraǵanda, 2006 jyly jazasyn ótep shyqqan T.Shaıhıev tıisti qorytyndy shyǵarmaı, qaıtadan qylmysqa barǵan. Sportshylar ortasyndaǵy bedelin paıdalana otyryp, qala kásipkerlerin qorqytyp, tabys tabýǵa bel býǵan.
Shaıhıev 2021 jyly qylmystyq top quryp, onyń múshelerin qarý-jaraq, oq-dárimen, avtokólik, baılanys quraldary, qujattarmen qamtamasyz etken. Topty «Shaıhıevskıe» dep atap, oǵan ózi basshylyq etken. Onyń quramyna Shaıhıevtiń senimdi adamdary – Bısenǵalıev, Ihlasov, Balmuhambetov, Bekmýldın, Súleımenov jáne Ermekqalı engen. Qylmystyq jolmen tapqan paıdany top basshysy óz qalaýynsha bólgen. Sondaı-aq ol toptyń is-áreketin, kek alý, qorqytýdy josparlaǵan.
Aıyptaý tarabynyń málimeti boıynsha Bısenǵalıev Shaıhıevtiń kómekshisi bolǵan. Onyń mindetine toptyń jańa múshelerin jáne qurbandyqtardy izdeý, Shaıhıevtiń tapsyrmalarynyń oryndalýyn baqylaý, qylmysqa daıyndalý, «sheftiń» buıryǵyn oryndaý kirgen. Ihlasov, Súleımenov, Ermekqalı, Balmuhambetov jáne Bekmýldın topqa belsendi qatysqan.
Alǵashqy qylmys 2021 jyldyń qarashasynda jasalǵan. Jóndeý zaýyty aýdanynda bos qalǵan bazada eki er adam soqqyǵa jyǵylǵan. Uıymdasqan top músheleri uryp-soǵý kezinde jábirlenýshilerdiń qolyn baılaý, basyna qap kıgizý, bas bostandyǵynan aıyrý sııaqty tásilderdi qoldanyp, qorqytqan. Mundaı qylmystar 2025 jylǵa deıin jalǵasqan. Kóptegen epızodtarda jábirlenýshiler retinde «Aıajan» saýda úıiniń ıesi men ókilderi atalady.
Sottalýshylarǵa barlyǵy 14 epızod boıynsha aıyp taǵylyp otyr. Bul rette qylmystyq top aqsha ǵana emes, Taıland pen Vetnamdaǵy sheteldik kýrorttarǵa joldamalardy da alǵan. Shaıhıev óziniń týǵan kúninde kásipkerden 15 mln teńge turatyn Rolex saǵatyn talap etken. Keıin oılanyp, 15 mln teńge talap etken. Ony kásipker úsh bólip bergen. Al ulynyń úılený toıyna shashý retinde 10 myń dollar suraǵan. Bermegen jaǵdaıda jábirlenýshige kúsh qoldaný qaýpi tóngen.
Qylmystyq isti sýdıa Raıgúl Amangeldınova qaraýda.
Eske sala keteıik, budan buryn Batys Qazaqstan ýnıversıtetiniń rektoryna qatysty tergeý júrgizilip jatqanyn jazǵan edik.
