Apellıatsııalyq sot stýdenttiń alıment alý quqyǵyn qorǵady
ORAL. KAZINFORM - Batys Qazaqstan oblysynyń mamandandyrylǵan aýdanaralyq ákimshilik soty 2022 jyly 18 jastaǵy ulynyń Eýropada oqýyna, sondaı-aq oǵan jumsalatyn shyǵyndy tóleýge mindettengen Oral qalasynyń turǵynyn jeke sot oryndaýshysymen (JSO) tatýlastyrǵan.
Batys Qazaqstan sottary Telegram arnasynyń habarlaýynsha, kelisimge sáıkes 4 jyl oqýǵa (2022–2027 jj.) tólem somasy 20 mln teńgeni quraǵan. Osy kelisim negizinde atqarý óndirisi qozǵalǵan. Alaıda, keıinirek ákesi qarajatty tóleýden bas tartyp, sotqa júginip, jeke sot oryndaýshysynyń atqarýshylyq is qozǵaý jáne odan osy alıment tólemderin óndirip alý jónindegi áreketterine shaǵymdanǵan.
Soty onyń ulynyń Eýropada oqıtyny týraly dálelderdiń joqtyǵy týraly ákesiniń aıqandaryn senimdi dep taýyp, talap qoıýdy qanaǵattandyrǵan, sonymen qatar talap qoıýdy merziminen buryn berilgen dep eseptegen.
Apellıatsııa bul tujyrymdardyń istiń mán-jaıyna, ádildik pen parasattylyq qaǵıdattaryna sáıkes kelmeıtinin anyqtady.
Ákesiniń uly protseske qatysýshy emes, sondyqtan talap qoıýshy bola almaıdy degen dálelderi qabyldanbady, óıtkeni kelisim sharttarynda onyń oqý aqysyn tóleý mindeti tikeleı kórsetilgen. Kelisimge ákesi «Men oqydym jáne kelisemin» degen jazýmen qol qoıǵan.
20 mln teńge óndirip alý týraly atqarýshylyq is júrgizýdiń negizsiz qozǵalýyna qatysty dálelder de nazarǵa alynbady.
Sot talqylaýynda ákeniń ózi jasaǵan redaktsııalaý aktisine sáıkes, óndirip alý somasy 20 mln teńgeden 5 mln teńgege ózgertilgen (2023-2024 oqý jylyna).
Onyń Eýropada oqýyn rastaý úshin Madrıdtegi Eýropalyq ýnıversıtetten talap qoıýshynyń ulyn 2023–2024 oqý jylyna dene shynyqtyrý jáne sport fakýltetine stýdent retinde qabyldaý týraly hat usynylǵan.
Apellıatsııa, sottan aıyrmashylyǵy, bul hatty ruqsat etilgen dálel retinde tanydy, onyń túpnusqasy is materıaldaryna qosa berilip, ulynyń vıza alǵanyn jáne onyń Madrıdke kelgenin rastaıtyn tólqujat pen bılettiń fotosýretteri de usynylǵan.
Sonymen qatar, stýdenttiń ózi Ispanııada 2023 jyldyń qyrkúıeginen bastap Madrıdtegi Eýropa ýnıversıtetinde oqıtynyn rastaǵan, 2023 jyldyń qyrkúıek jáne qazan aılary úshin oqý aqysyn tóleý týraly qujattardy, sondaı-aq oqýyna baılanysty onyń Ispanııa Koroldiginde ýaqytsha konsýldyq tirkelýi týraly QR SІM Konsýldyq qyzmet departamentiniń jaýabyn usynǵan.
Osy málimetterdiń negizinde MAÁS-nyń sheshimi ózgertildi, stýdenttiń ákesiniń talap qoıýyna bas tartyldy.
Osyǵan deıin BQO-da alımentten jaltarǵan qos azamattyǵy bar er adamǵa jarty mln teńge aıyppul salynǵany týraly jazdyq.