BQO shekaralaryndaǵy avtoótkelderde sanıtarlyq talaptar kúsheıtildi

ORAL. QazAqparat – QR bas memlekettik sanıtar dárigeriniń qaýlysyna sáıkes BQO-da Reseımen shekaradaǵy 4 avtoótkelde karantındik-sanıtarlyq beketterdiń jumysy kúsheıtildi, dep habarlaıdy QazAqparat tilshisi.

BQO taýarlar men kórsetiletin taýarlardyń sapasy men qaýipsizdigin baqylaý departamentiniń baspasóz qyzmeti habarlaǵanyndaı, atalmysh avtoótkelderden jaıaý ótken adamdardan PTR ádisimen COVID-19-ǵa testiden ótkeni jóninde anyqtamalar talap etilýde.

Ótken táýlikte «Syrym» avtoótkelinen 222 júk kóligi jáne qazaqstandyq úsh azamat jaıaý ótken. Jaıaý júrginshilerdiń qolynda anyqtamalary bolǵan.

«Aqsaı» beketinen 8 júk kóligi ótti, jaıaý júrginshiler joq.

«Tasqala» beketinen 12 júk kóligi, 8 jaıaý adam ótti. Jaıaý júrginshilerdiń eshqaısysynda da PTR test anyqtamasy bolmaǵandyqtan, azamattar Tasqala aýylyndaǵy karantındik statsıonarǵa jatqyzyldy. Olardan zerthanaǵa synama alyndy.

«Jánibek» beketinen 3 júk kóligi ótken, jaıaý júrginshiler bolmady.

Bul baǵyttaǵy jumystar jalǵasýda.

Jalpy, oblystaǵy epıdemıologııalyq ahýal salystyrmaly túrde turaqty. Óńirde osy kezge deıin koronavırýs juqpasymen 6872 adam tirkelip, sonyń 6747-si jazylyp

shyqty. 109 adam kóz jumdy.

Ótken táýlikte eki adamnan koronavırýs anyqtaldy. Onyń bireýi buryn aýyrǵan adammen qarym-qatynasta bolǵan.

Ekinshisi JRVJ belgilerimen ózdiginen emhanaǵa júgingen.

Eske sala keteıik, budan buryn BQO-men kórshiles Reseı oblystarynda koronavırýs kóp tirkelip otyrǵanyn jazǵan bolatynbyz.