BQO sharýalary Astanaǵa 120 tonna aýyl sharýashylyq ónimin ákeldi

Astananyń 20 jyldyq mereıtoıyna oraı uıymdastyrylǵan jármeńke búgin jáne erteń «Qazaqstan» sport kesheniniń turaq aımaǵynda ótedi.  

«Batys Qazaqstan oblysy astanalyqtarǵa 32 tonna jylqy jáne sıyr eti, 10 tonna qalbyrdaǵy ónim, 16 tonna et jáne shujyq ónimderi, 10 tonna un men jarma ónimderi, sondaı-aq bir tonna ósimdik maıy, 10 tonna balyq, 2,3 myń lıtr kvas, shyryn sekildi sýsyndar men 1 tonna kondıter ónimderin usynady», - deıdi Batys Qazaqstan oblysy Aýyl sharýashylyǵy basqarmasy basshysynyń orynbasary Jasulan Halıýllın.

Elorda turǵyndarynyń azyq-túlik ónimderin qoljetimdi baǵamen satyp alýyna jaǵdaı jasaý úshin jármeńke senbi jáne jeksenbi kúnderi ótkiziledi. Ondaǵy taýar baǵasy qala bazarlaryndaǵy baǵadan tómen bolady.

«Bizdiń aýdannyń kásipkerleri jyl saıyn jármeńkede ózderiniń óndirgen taýar ónimderin ákelip satady. Bul joly toǵyz uıym taýarlaryn satpaq. Barlyǵy tabıǵı jáne taza ónimder», - dedi Zelenov aýdany ákiminiń orynbasary Dúısen Zalmuqanov.

Jármeńkede ortasha baǵa boıynsha sıyr eti - 1400, jylqy eti - 1600, et jáne shujyq ónimderi - 1500, balyq  - 700, sýsyndar - 110, ósimdik maıy - 370, kondıterlik ónimder - 300-1500 teńge aralyǵynda satylady.

Aıta keteıik, buǵan deıin qalada Túrkistan me Qaraǵandy oblystarynyń aýylsharýashylyq jármeńkeleri ótken bolatyn.

«Elordada óńirlerdiń ótkizetin jármeńkesiniń qala turǵyndary úshin orny bólek. Jármeńkeniń baǵasy tómen ári qoldan óndirilgen ónimder bolady. Bıylǵy jármeńkeler elordanyń 20 jyldyq mereıtoıyna arnalady. Mundaı sharalar Astanananyń azyq-túlik beldeýiniń júktemesin birshama azaıtady», - dedi Astana qalasynyń Investıtsııalar jáne kásipkerlikti damytý basqarmasy basshysynyń orynbasary Rýslan Idrısov.

Buǵan qosa, jármeńkede astanalyqtardyń nazaryna aýyl sharýashylyǵy ónimderinen bólek eki kún boıy túrli kontserttik baǵdarlamalar usynylady.