BQO respýblıkalyq bıýdjetke 990 mlrd teńge aýdardy — Ákim esebi

ASTANA. KAZINFORM — Bıyl Batys Qazaqstan oblysynyń bıýdjeti 33,5% ulǵaıyp, 634 mlrd teńgege jetti. Bul týraly oblys ákimi Narıman Tóreǵalıev eseptik kezdesýinde aıtty.

Ákimniń aıtýynsha, óńir ekonomıkasy turaqty damý dınamıkasyn saqtap keledi. Investıtsııalar kólemi artyp, shaǵyn jáne orta bızneske qoldaý kúsheıtildi. Aýyl sharýashylyǵy men ónerkásip salalarynda jańa jobalar iske asyrylyp jatyr.

— Atap aıtqanda, qurylys salasyndaǵy jumystar kólemi 9%-ǵa, turǵyn úıdi paıdalanýǵa berý kórsetkishi 4,1%-ǵa artyp, negizgi kapıtalǵa salynǵan ınvestıtsııalar 1,2%-ǵa ósti. Іshki saýda kólemi 0,7%-ǵa, kólik qyzmetteri 1,2%-ǵa, baılanys qyzmetteri 6,2%-ǵa, ónerkásip 3,6%-ǵa, al aýyl sharýashylyǵynyń jalpy ónimi 6,4%-ǵa artty. Oblys bıýdjeti 33,5% ulǵaıyp, 475 mlrd teńgeden 634 mlrd teńgege jetti, — dedi N. Tóreǵalıev elordada Ortalyq kommýnıkatsııalar qyzmetinde.

Oblystaǵy ortasha aılyq jalaqy 316 myń teńgeden 369 myń teńgege nemese 16,6 paıyzǵa artqan.

Ótken úsh jylda jalpy óńirlik ónimniń kólemi 4,4 trln teńgeden 4,7 trln teńgege nemese 6,5%-ǵa ósti.

— Memlekettik bıýdjetke 1,6 trln teńge tústi, onyń ishinde 597 mlrd teńge jergilikti bıýdjetke, al 990 mlrd teńge respýblıkalyq bıýdjetke baǵyttaldy. Sonymen qatar, Ulttyq qorǵa 2,8 trln teńge aýdaryldy, — dedi BQO ákimi.

Óńir ekonomıkasynyń basym baǵyttary ishinde munaı-gaz, óńdeý ónerkásibi, mashına jasaý, qurylys ındýstrııasy jáne agroónerkásip kesheni bar. Atalǵan salalarda 30 000-nan astam adam eńbek etip, ishki naryqty básekege qabiletti ónimmen qamtamasyz etip, syrtqy naryqqa da eksporttap otyr.