BQO prokýratýrasy «Máńgilik eldiń uly Abaıy» baıqaýyn ótkizdi

ORAL. QazAqparat - Búgin «Rýhanı jańǵyrý» baǵdarlamasy aıasynda óńirdegi prokýratýra qyzmetkerleri arasynda qazaqtyń uly aqyny Abaı Qunanbaıulynyń 172 jyldyǵyna oraı «Máńgilik eldiń uly Abaıy» baıqaýy márege jetti, dep habarlaıdy «QazAqparat» tilshisi.

BQO prokýratýrasynyń baspasóz qyzmetinen túsken málimetke qaraǵanda, alǵash ret uıymdastyrylǵan shara maqsaty - halqymyzdyń rýhanı murasyn nasıhattaý, Abaı óleńderi men qara sózderi arqyly qazaq tili men ádebıetine degen qushtarlyqty arttyrý, keıingi urpaqty otanshyldyq rýhynda tárbıeleý.



Úsh kezeńnen turatyn baıqaýǵa qatysýshylar aldymen Abaıdyń bir óleńin mánerlep oqydy. Sodan keıin Abaıdyń ómiri men shyǵarmashylyǵyna qatysty saýaldarǵa jaýap berdi. Úshinshi kezeńde Abaıdyń qara sózin oqyp, túsinikteme berdi. Olardyń ónerin BQO prokýrorynyń orynbasary Tájiden Naımanov bastaǵan qazylar alqasy baǵalady.

Saıys qorytyndysynda oblys prokýratýrasy basqarmasynyń aǵa prokýrory Álııa Denızbaeva bas júldeni jeńip alyp, Abaıdyń týǵan jerine saıahattaý quqyǵyna ıe boldy.



Tasqala aýdandyq prokýratýrasynyń jetekshi mamany Baqytgúl Táshimova birinshi, oblys prokýratýrasynyń is júrgizýshisi Aıda Tapısheva ekinshi, Qaratóbe aýdandyq prokýratýrasynyń is júrgizýshisi Bulbul Rysqalıeva úshinshi oryndy enshiledi. Qaratóbe aýdandyq prokýratýrasynyń prokýrory Raıhan Muqanova «Abaıtanýshy», Bókeı ordasy prokýratýrasynyń prokýrory Nurat Samatov «Kórkem sóz sheberi», Oral qalasy prokýratýrasy bóliminiń aǵa prokýrory Jandos Jubanov «Qara sóz sheberi» atalymymen marapattaldy. Barlyq qatysýshylarǵa gramotalar men baǵaly syılyqtar tabys etildi.