BQO polıtseılerine 100-ge jýyq jańa avtokóliktiń kilti tapsyryldy
Batys Qazaqstan oblysynda polıtsııa qyzmetkerlerine 100-ge jýyq jańa avtokóliktiń kilti tapsyryldy, dep habarlaıdy Kazinform.
Saltanatty rásimge qatysqan oblys ákimi Narıman Tóreǵalıev memleket tarapynan polıtsııa qurylymdarynyń materıaldyq-tehnıkalyq bazasyn nyǵaıtý baǵytynda kóptegen jumys qolǵa alynǵanyn atap ótti.
«Táýelsizdik kúni qarsańynda polıtsııa qyzmetkerlerine jańa avtokólikterdiń kiltin tapsyryp otyrmyz. Bıyldyń ózinde BQO polıtsııa departamentiniń materıaldyq-tehnıkalyq bazasyn jaraqtandyrýǵa 5,7 mlrd teńge bólindi. Jalpy somasy 2,1 mlrd teńgege 148 qyzmettik avtokólik satyp alyndy. 685 mln teńgege «Prızma-Stos» júıesiniń 21 jyldamdyq ólshegishi ornatyldy. Planshetter men jyljymaly termoprınterler, kóshi-qon qyzmetine arnalǵan mobıldi bıometrııalyq termınal sekildi jabdyqtar alyndy. Jańa úlgidegi kıim-keshekpen barlyq jeke quram qamtamasyz etildi. Osydan-aq jergilikti tártip saqshylaryn qoldaý baǵytynda atqarylyp jatqan isterdi kórýge bolady. El irgesi bútin, táýelsizdigimiz máńgi bolsyn!», - dedi óńir basshysy.
Polıtseılerge berilgen kólikter qatarynda ótimdiligi joǵary qýatty kvadrotsıklder, «Kıber-Sherıf» júıesimen jabdyqtalǵan «Kıa Tserato» avtomobılderi bar. Bul jol qozǵalysy barysynda jyldamdyqty baqylap, kólik júrgizý quqyǵynan aıyrylǵan júrgizýshilerdi, sondaı-aq tehnıkalyq baıqaýdan ótpegen, saqtandyrý polısi joq kólik quraldaryn anyqtaýǵa múmkindik beredi.
BQO polıtsııa departamentiniń bastyǵy Arman Orazalıevtiń aıtýynsha, patrýldik polıtsııa avtoparki jańa 96 mashınamen tolyqtyryldy.
«Búginnen bastap úsh jańa «Kıber-Sherıf» avtokóligi qyzmetke kirisedi. Aldaǵy jyly taǵy osyndaı 17 avtokólik satyp alý kózdelýde. Jańa jabdyq jol erejesin buzýshylardy jedel anyqtap, sharalar qabyldaýǵa múmkindik beredi. Jyl basynan beri 1 mlrd-taı teńge aıyppul salynyp, bıýdjetke óndirildi. Sonyń ishinde Aqsaı qalasynda ornatylǵan jańa beınekameralardyń kómegimen 23 qarashadan beri 1 700-deı túrli quqyqbuzýshylyq anyqtalyp, 43 mln astam teńge aıyppul salyndy», - dedi A.Orazalıev.
