BQO polıtsııasy Jaıyqtan tabylǵan adamnyń kim ekenin 4 kúnnen beri anyqtaı almaı otyr

ORAL. QazAqparat - Batys Qazaqstan oblysynda Jaıyq ózenine batyp ketken er adamnyń denesi tabyldy, dep habarlaıdy QazAqparat.

Batys Qazaqstan oblystyq polıtsııa departamenti sýǵa ketken adamnyń kim ekenin anyqtaı almaı otyr.

Bul jaıynda vedomstvo Instagram paraqshasynda málim etti.

«14 shilde kúni saǵat 18:20 shamasynda Pýgachev kóshesindegi Jaıyq ózeniniń jaǵasynan er adamnyń denesi tabyldy. Onyń túr-kelbeti - eýropalyq, shashynyń túsi - sary-qońyr. Shamamen 35-40 jasta. Moınynda krest kýlondy kúmis alqasy bar» dep habarlady polıtsııa departamentinen.

Aıta keteıik, osy ýaqytqa deıin kelbeti marqumǵa uqsas adamdy izdep, eshkim polıtsııaǵa qońyraý shalmaǵan.

Oqıǵa kýágeri bolǵan nemese ol jaıly qandaı da bir aqparat biletin jan bolsa, 102 nemese 8707 881 66 66 nómirine qońyraý shalǵany abzal.