BQO polıtsııa departamentinde «Kıberpol» toby jumysqa kiristi

ORAL. QazAqparat – Batys Qazaqstan oblysy polıtsııa departamentinde kıberqylmystarmen kúresetin jańa bólinis óz jumysyn bastady, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, jańa qurylymnyń aldynda turǵan basty mindet – ınternet alaıaqtyqqa qarsy kúresti kúsheıtip, qylmystyń aldyn alý.

Jańa bólinistiń ashylý rásimine BQO PD bastyǵy, polıtsııa polkovnıgi Arman Orazalıev, oblys prokýrorynyń orynbasary Nurlan Ermanov qatysty.

«Kıberpol» pılottyq jobasyn iske asyrý úshin biz bıyl 19 mamyrdan bastap jumys júrgizip kelemiz. Bul qylmysty ashý jáne tergeýdi bir mamandandyrylǵan top iske asyratyn bolady. Toptyń quramynda 9 qyzmetker (4 tergeýshi, 4 jedel ýákil, 1 krımınalıst) bar, olar zamanaýı tehnıkamen jaraqtaldy. Qyzmetkerler «bir tereze» qaǵıdaty boıynsha jumys istep, aryz-shaǵym kelip túskennen keıin birden barlyq kezek kúttirmeıtin tergeý jáne jedel izdestirý is-sharalaryn bir ýaqytta júrgizetin bolady», - dedi A.Orazalıev.

«Kıberpol» arnaıy bólinisi tsıfrlyq laboratorııamen jabdyqtalǵan. Bólinistegi mamandar gadjetterdi baqylaý arqyly ınternet-alaıaqtar qoldanatyn baǵdarlamalardy da anyqtaı alady.

Qazirgi ýaqytta atalǵan bólinistiń jetken jetistikteri de joq emes. «Kıberpol» toby jumys istegennen beri 15 qylmys ashylyp, sotqa joldandy, al 33 is boıynsha sotqa deıingi tergeý amaldary júrgizilip jatyr.

Eske sala keteıik, budan buryn BQO-da qoǵamdyq kómekshilerdiń járdemimen 56 qylmys ashylǵanyn jazǵan bolatynbyz.