BQO polıtseıleri otbasylyq úlgidegi balalar aýylynyń tárbıelenýshilerine jol erejesin úıretýde
BQO ІІD baspasóz qyzmetinen túsken málimetke qaraǵanda, «Mektepke jol» aıasynda ákimshilik polıtsııa basqarmasynyń qyzmetkerleri Oral qalasyndaǵy otbasylyq úlgidegi balalar aýylynda bolyp, jol qaýipsizdigi boıynsha 4-14 jas aralyǵyndaǵy balalardyń qatysýymen is-shara ótkizdi. Balalar aýylynda barlyǵy 74 bala tárbıelenetin bolsa, sonyń qyryqtan astamy sharaǵa qatysty.
Shara maqsaty - balalardyń qatysýymen bolatyn jol-kólik oqıǵalarynyń aldyn alý. Bıylǵy alty aıda óńirde balalardyń qatysýymen 33 jol-kólik oqıǵasy bolyp, 7 bala qaza tapsa, 35-i túrli jaraqat alǵan bolatyn.
Balalar aýylynyń pedagogy Zúlfııa Muqanovanyń aıtýynsha, mundaı teatrlandyrylǵan sharalar balalar úıinde jıi uıymdastyrylyp turady, sonyń nátıjesinde tárbıelenýshiler jol qaýipsizdigi jónindegi oblystyq baıqaýlarǵa qatysyp, jeńimpaz atanyp júr.
Sharanyń basty uıymdastyrýshysy, BQO ІІD ákimshilik polıtsııa basqarmasynyń aǵa ınspektory Nurtaı Lezov balalarǵa jol qozǵalysy erejesin túsindirip, olarǵa estelik syılyqtarmen qatar oqý quraldaryn tabys etti. Sharaǵa belsendi qatysýshylar da umyt qalǵan joq.
N.Lezovtyń sózine qaraǵanda, jańa oqý jylyna deıin mektepterde jol erejesi boıynsha synyptar ashylady. Sondaı-aq az qamtylǵan otbasylar balalaryna oqý quraldary tapsyrylady.
Aıta keteıik, ótken jyly BQO ІІD qyzmetkerleri áleýmettik jaǵynan az qamtylǵan otbasylarda tárbıelenetin jáne jetim balalardyń mektepten qalmaýy úshin bir kúndik jalaqylaryn (6 mln. teńge) aýdarǵan bolatyn. Osy maqsatqa bıyl 5 mln teńge bólý oılastyrylýda.