BQO polıtseıleri aýylǵa kirip ketken qabandy atyp óltirýge májbúr boldy
ORAL. QazAqparat – Batys Qazaqstan oblysynda aýylǵa jabaıy qaban kirip ketti, dep habarlaıdy QazAqparat tilshisi.
BQO Polıtsııa departamentiniń baspasóz qyzmetinen túsken málimetke qaraǵanda, oqıǵa keshe keshkisin Báıterek aýdanynyń ortalyǵy Peremetnyı kentinde bolǵan.
Saǵat 18.56-da aýyl turǵynynan balalar oınaıtyn alańda jabaıy qabannyń júrgeni jóninde habar túsken.
Oqıǵa ornyna eki polıtsııa qyzmetkeri kelip jetken. Olar qabandy aýyldan shyǵaryp jiberý úshin sharalar qoldanǵan. Alaıda, qaban oǵan ońaılyqpen kóne qoımaı, adamdar ómirine qaýip tóndirgen. Sondyqtan polıtsııa ınspektorlary «Quqyq qorǵaý qyzmeti týraly» QR Zańynyń 61-baby 1-bóligi 6-tarmaǵyna (adam ómirine nemese densaýlyǵyna is júzinde qater tóndirgen jaǵdaılarda haıýanattardyń shabýylynan qorǵaný maqsatynda atys qarýyn jáne ózge de qarýdy qoldaný) sáıkes tabeldik qarýdy qoldanýǵa májbúr bolǵan.
«Atys qarýy qoldanylǵany jóninde aqparat Báıterek aýdany prokýroryna habarlandy», - dedi PD-dan.
Eske sala keteıik, budan buryn da Qaztalov aýdanynda aýylǵa qaban kirip ketkenin jazǵan bolatynbyz.
