BQO ózenderinde muz jarý jumystary qalaı júrgizilip jatyr
ORAL. KAZINFORM – Batys Qazaqstan oblysy aýmaǵyndaǵy ózenderde muz jarý jumystary bastaldy.
BQO jumyldyrý daıyndyǵy, aýmaqtyq jáne azamattyq qorǵanys basqarmasynyń basshysy Álibek Tashımovtiń málim etkenindeı, «Qazgıdromet» RMK BQO fılıalynyń málimetine sáıkes óńirde naýryz aıynyń ekinshi onkúndiginde kún jylıdy dep boljanyp otyr.
Álibek Qazıhanulynyń sózine qaraǵanda, muz keptelisteriniń paıda bolýynyń aldyn alý jáne sý tasqyny kezeńiniń qaýipsiz ótýin qamtamasyz etý maqsatynda óńirdiń sý aıdyndarynda muzdy jarý jáne usaqtaý jumystaryn júrgizý kózdelgen.
– Oblys boıynsha jalpy kólemi 47 myń sharshy metr 83 muz jarý ýchaskesi aıqyndaldy. Batys Qazaqstan oblysy aýmaǵyndaǵy ózenderdiń qaýipti bólikterinde muzdy qopsytý, usaqtaý jáne muz keptelisterin joıýǵa baǵyttalǵan jarylys jumystarynyń kestesi bekitildi. Muz jarý jumystary bekitilgen is-qımyl algorıtmine sáıkes júrgiziledi. Atalǵan sharalardy júzege asyrý úshin oblystyq bıýdjetten 184 mln teńge qarajat bólindi. Konkýrstyq jumystar júrgizilip, merdiger uıym retinde shyǵysqazaqstandyq «Normal Work» JShS anyqtaldy, - deıdi Á.Tashımov.
Onyń aıtýynsha, búgin Oral qalasynda Shaǵan men Derkóldiń qıylysynda, Jánibek aýdanynda Jaqsybaı, Báıterekte Bykovka, Rýbejka ózenderinde muz jarý bastaldy. Bul jumystar on kúnge sozylady. Munyń basym kópshiligi Shaǵan, Derkól jáne Shyńǵyrlaý ózenderinde atqarylady. Turǵyndardyń buǵan túsinistikpen qarap, jarylys júrgiziletin oryndarǵa jaqyndamaýy qajet.
Basqarma basshysynyń málimdeýinshe, Batys Qazaqstanda muz jarýmen arnaıy aınalysatyn kompanııa joq. Geologııalyq barlaý jumystaryn júrgizetin mekemelermen kelissóz júrgizilgenimen, olar muz jarýǵa kelispegen.
«Normal Work» JShS jarýshysy Rýslan Omarov Óskemen qalasynan úsh brıgada quramynda 12 adam kelgenin jetkizdi.
– Jarylǵysh zattar arnaıy jasaqtalǵan avtokólikpen (jyljymaly qoıma) jetkiziledi. Kúzetshige qosa arnaıy júrgizýshi, jarýshy bolady. Biz qoldanyp júrgen materıaldardyń bári ózdiginen jarylmaıdy. Jumys arnaıy tehnologııamen ǵana atqarylady. Kompanııa 2010 jyly qurylǵannan beri Qazaqstanda jarylys jumystarymen aınalysyp keledi. Oralǵa birinshi ret aıaq basyp turmyz, - dedi R.Omarov.
BQO TJD tótenshe jaǵdaılardyń aldyn alý basqarmasynyń bastyǵy Nuraly Músıev oblys aýmaǵynda «Sý tasqyny — 2026» aılyǵy barysynda eldi mekenderden qar shyǵarý, kanaldardy, sý ótkizetin qubyrlardy tazalaý jumystarynyń júrgizilip jatqanyn aıtty.
– Qazirgi tańda turǵyndarmen aýladaǵy qardy shyǵarý jóninde túsindirý jumystarymen aınalysyp jatyrmyz. Qardy ýaqytyly shyǵarmasa, ol erip, aýlany sý basýy yqtımal. Osy rette QR Ákimshilik quqyq buzýshylyq týraly kodeksiniń 505-babyna sáıkes ákimshilik jaýapkershilik qarastyrylǵan. Aldymen eskertý beriledi, qaıtalanǵan jaǵdaıda ákimshilik jaýapkershilikke tartylady. Jalpy, oblysta qaýip joq dep aıtýǵa erte. Bári de aýa raıyna, qardyń erýine baılanysty. «Qazgıdromet» RMK BQO fılıalynyń naýryz aıynyń basyndaǵy málimetine qaraǵanda, oblys ózenderinde muzdyń qalyńdyǵy 18-60 sm, bul ótken jylǵydan tómen, - dep qosty N.Músıev.
Eske sala keteıik, budan buryn Batys Qazaqstanda sý tasqynynan keler qaýip qandaı ekenin jazǵanbyz.
Sý tasqynyna daıyndyq barysynda BQO-nyń birqatar aýdanynda tehnıkalar sany sáıkes bolmaı otyr.