BQO: Óz komandırin atyp óltirgen polıtsııa qyzmetkeri qamaýǵa alyndy
ORAL. QazAqparat - Aqjaıyq aýdanynda óz komandırin atyp óltirgen polıtsııa qyzmetkeri eki aıǵa qamaýǵa alyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Aqjaıyq aýdandyq sotynyń tergeý sýdıasy Ámirhan Kýlıkeshev tóraǵalyq etken sot otyrysynda 1994 jylǵy S. esimdi kúdiktini kúzetpen ustaý bultartpaý sharasy sanktsııalandy.
Sot otyrysynda belgili bolǵanyndaı, S. BQO mamandandyrylǵan kúzet qyzmeti basqarmasy memlekettik mekemesiniń buıryǵyna sáıkes 2016 jyly 15 sáýirde 2-polıtsııa batalonyna (Aqjaıyq aýdany) S-SV-12 sanaty boıynsha polıtseıi laýazymyna taǵaıyndalǵan.
Bıylǵy 6 qyrkúıek kúni saǵat 16.30 shamasynda S. aýdandyq ishki ister bóliminiń ǵımaratyna kelip, kezekshilikke turý úshin ózine bekitilgen PM-9 qyzmettik tapanshasyn eki oqshantaıymen birge alǵan.
Ol osy kezde kezekshilikke turatyn qyzmetkerlerdi taratýǵa kelgen vzvod komandıri, polıtsııa kapıtany, 1986 jylǵy R-men jumys barysynda sózge kelgen. Sonyń saldarynan S. aýdandyq ishki ister bólimi ǵımaratynyń aldyńǵy esiginen shyǵyp, baspaldaqpen túsip, ketip bara jatqan R-nyń artynan 7 márte oq atyp, qasaqana qazaǵa ushyratqan.
Kúdikti 16.40-ta ustalyp, QR QK 99-baby 1-bóligine sáıkes qylmystyq is qozǵaldy.
Eske sala keteıik, budan buryn polıtsııa qyzmetkeriniń vzvod komandırin atyp óltirgenin jazǵan bolatynbyz.
Qazirgi kezde tergeý amaldary jalǵasýda.
