BQO orys drama teatrynyń 162-maýsymy jańa premeramen ashyldy
ORAL. QazAqparat – A.Ostrovskıı atyndaǵy oblystyq orys drama teatrynyń 162-maýsymy jańa premeramen ashyldy, dep habarlaıdy QazAqparat tilshisi.
Koronavırýs indetine baılanysty úzilisten keıin teatr ujymy Otfrıd Proıslerdiń «Kishkentaı Mystan kempirin» («Malenkaıa Baba-ıAga») sahnalady.
Spektakldi qoıǵan rejısser Rýslan Djýmahmetov.
«Kishkentaı Mystan kempir» ertegisi balalar, sondaı-aq eresekter úshin de tartymdy. Spektakl sahnalyq kórkemdelýi men kompıýterlik jaryqtandyrylýymen erekshelenedi.
Bas rejısser Oksana Malýshanyń aıtýynsha, «Kishkentaı Mystan kempir» teatrdyń turaqty repertýaryna enetin bolady.
Sonymen qatar kórermender Nıkolaı Gogoldiń «Úılený» («Jenıtba») komedııasyn (rejısseri O.Malýsha) da qyzyǵa tamashalady. Shyǵarma osydan eki ǵasyrdaı buryn jazylsa da, mańyzdylyǵyn joıǵan joq.
Jańa maýsymnyń ashylýy kezinde teatr ardageri, QR mádenıet qaıratkeri, trýppa meńgerýshisi Ilıa Taranovqa 55 jasqa tolýyna oraı qurmet kórsetildi.
«Teatrda barlyq sanıtarlyq-epıdemıologııalyq talaptar saqtalyp otyr, kórermender sany 50-den aspaıdy. Spektaklder senbi jáne jeksenbi kúnderi qoıylady. Qazirgi tańda teatr Jeńistiń 75 jyldyǵyna oraı Vıktor Rozovtyń «Máńgi tiri» («Vechno jıvye») shyǵarmasy boıynsha jańa qoıylymdy ázirleýde», dedi Oksana Malýsha.
Eske sala keteıik, budan buryn BQO teatrynda «Juban» spektakliniń qoıylǵanyn jazǵan bolatynbyz.
