BQO óńdeý ónerkásibi kólemi 17 paıyzǵa ósip, 303 mlrd teńgeni qurady
ASTANA. KAZINFORM – Búgin Astana qalasynda Prezıdent janyndaǵy Ortalyq kommýnıkatsııalar qyzmetiniń alańynda ótken brıfıng barysynda Batys Qazaqstan oblysynyń ákimi Narıman Tóreǵalıev óńirdiń áleýmettik-ekonomıkalyq damý qorytyndylary jóninde baıandady.
Ákim óz sózinde Memleket basshysy Qasym-Jomart Toqaevtyń Joldaýynda júktelgen mindetterdiń oblysta júıeli túrde júzege asyp jatqanyn atap ótti.
«Memleket basshysynyń Joldaýynda aıqyndalǵan strategııalyq mindetterdi óńirlik deńgeıde naqty jobalar men pármendi sharalar arqyly júzege asyratyn bolamyz. Jalpy oblys ekonomıkasy turaqty damý dınamıkasyn saqtap keledi. Investıtsııalar kólemi artyp, shaǵyn jáne orta bızneske qoldaý kúsheıtildi. Aýyl sharýashylyǵy men ónerkásip salalarynda jańa jobalar iske asyrylyp jatyr», - dedi BQO ákimi Narıman Tóreǵalıev.
Onyń aıtýynsha, BQO-da ótken jyly ekonomıkanyń negizgi salalary boıynsha turaqty ósimge qol jetkizildi. Bıyl da ekonomıkanyń ósý qarqyny saqtalýda.
Atap aıtqanda, qurylys salasyndaǵy jumystar kólemi 9%-ǵa, turǵyn úıdi paıdalanýǵa berý kórsetkishi 4,1%-ǵa artyp, negizgi kapıtalǵa salynǵan ınvestıtsııalar 1,2%-ǵa ósti. Іshki saýda kólemi 0,7%-ǵa, kólik qyzmetteri 1,2%-ǵa, baılanys qyzmetteri 6,2%-ǵa, ónerkásip 3,6%-ǵa, al aýyl sharýashylyǵynyń jalpy ónimi 6,4%-ǵa artty.
Jyl basynan beri oblysqa 567 mlrd teńge kóleminde ınvestıtsııa tartylyp, onyń 80 paıyzy teńgesi — jeke sektordyń úlesin quraǵan.
Aldaǵy bes jylda 4,4 trln teńgege 10 myńnan astam jańa jumys ornyn qurýmen 73 iri ınvestıtsııalyq jobany júzege asyrý josparlanyp otyr.
BQO-nyń óńdeý ónerkásibiniń kólemi 17 paıyzǵa ósip, 303 mlrd teńgeni qurady. Tikeleı sheteldik kapıtaldy tartý maqsatynda bıyl Chehııa, Reseı, Iran, Qytaı jáne Ońtústik Koreıa elderine baryp birqatar áleýetti ınvestorlarmen kelissózder júrgizilgen. Nátıjesinde, ónerkásip, qurylys, medıtsına, energetıka jáne aýyl sharýashylyǵy salalarynda jalpy quny 1 trln teńge bolatyn jobalar boıynsha memorandýmdarǵa qol qoıyldy.
Mańyzdy iri bastamalardyń biri — qytaılyq ınvestorlarmen birlesip «Batys POWER» kompanııasy gaz týrbınaly elektr stantsııasynyń qýatyn 414 MVt-qa deıin arttyrý jobasy, sonymen qatar, «ZhaikPetroleum Ltd» kompanııasy men Qytaıdyń «Foshan City Construction Engineering Co» kompanııasy jylyna 130 myń tonna metanol óndirý keshenin salýdy bastady. Irandyq «Persıst-Kazah» kompanııasy óńirimizdegi «Pýsh Rýno» teri óńdeý zaýytynyń jumysyn qaıta jańǵyrtýdy qolǵa aldy.
Agroónerkásip kesheni baǵytynda 50,6 mlrd teńge kóleminde qoldaý kórsetildi. Aýyl sharýashylyǵynyń jalpy ónim kólemi 6,4%-ǵa artyp, 281 mlrd teńgege jetti.
2025-2027 jyldary aýyl sharýashylyǵy salasynda jalpy quny 68,1 mlrd teńgeni quraıtyn 54 ınvestıtsııalyq jobany júzege asyrý arqyly 870 jumys ornyn qurý josparlanǵan.
Al bıyldyń ózinde jalpy quny 15,4 mlrd teńge bolatyn 18 joba iske asyrylýda.
BQO ákiminiń bastamasymen oblysta «Qaladan aýylǵa» jobasy iske qosylǵan bolatyn. Qysqa merzim ishinde-aq aýyl turǵyndary men qonys aýdarýshylar tarapynan keń qoldaý tapqan. Joba aıasynda qala aımaqtarynan myńǵa jýyq turǵyny bar 195 otbasy aýylǵa qonys aýdardy. Onyń 600-y bala.Qonys aýdarǵan otbasylardyń barlyǵy da baspanamen qamtamasyz etilip, turaqty jumysqa ornalasqan.
Óńir ekonomıkasynyń damýyna shaǵyn jáne orta kásipkerlik zor úlesin qosyp keledi. Ótken úsh jylda oblysta jumys istep turǵan shaǵyn jáne orta kásipkerlik sýbektileriniń sany 57,6 myńnan 59,2 myńǵa nemese 2,7%-ǵa ósken. Atalǵan salada 130 myńǵa jýyq adam jumyspen qamtylǵan. Óńirlik ónimdegi shaǵyn jáne orta kásipkerliktiń úlesi 36,7% deńgeıine jetti. Bul kórsetkish boıynsha BQO respýblıkada aldyńǵy bestikte.
Memleket basshysynyń tapsyrmalaryn júzege asyrý arqyly óńir turǵyndarynyń ómir sapasyn arttyrýǵa baǵyttalǵan júıeli jáne naqty jumystar atqarylǵan. Máselen, densaýlyq saqtaý salasynda 2023 jyldan beri 52 densaýlyq saqtaý nysany salyndy. Onyń ishinde «Aýylda densaýlyq saqtaýdy jańǵyrtý» ulttyq jobasy aıasynda 50 medıtsınalyq nysan paıdalanýǵa berilgen.
Balalardyń sapaly bilim alýyna qolaıly jaǵdaı jasaý maqsatynda 2023 jyldan beri óńirde 27 jańa mektep paıdalanýǵa berildi. Onyń 9-y Keleshek mektepteri jobasy aıasynda salyndy. Jyl sońyna deıin taǵy 3 jańa mektep el ıgiligine berilmek.
2023–2025 jyldary sport ınfraqurylymyn damytý maqsatynda 12 sport nysany paıdalanýǵa berildi.
Memleket basshysynyń oblysqa jumys sapary barysynda bergen tapsyrmasyna sáıkes Oral qalasynda 1200 oryndyq zamanaýı sport kesheni el ıgiligine berildi.
Bıyl 9 sport nysanynyń qurylysy jalǵasýda, olardyń beseýin jyl sońyna deıin aıaqtaý josparlanyp otyr.
Sońǵy úsh jylda BQO-da 11 mádenıet úıleri jáne mádenı-sporttyq keshender paıdalanýǵa berildi. Bıyl 7 mádenıet nysanynyń qurylysy júrgizilip jatyr, olardyń 4 jyl sońyna deıin iske qosylady.
BQO-da 1 500 shaqyrym avtomobıl joldary jóndeýden ótken. Sonyń ishinde jalpy uzyndyǵy 560 shaqyrym bolatyn 56 eldi mekende kire beris jol jóndeldi.
«Memleket basshysynyń tapsyrmasyna sáıkes, oblys ortalyǵy men ońtústik aýdandar — Kaztalov, Jánibek, Bókeı Ordasy baǵytyndaǵy kólik qatynasyn jaqsartý maqsatynda jalpy uzyndyǵy 245 shaqyrym jol kúrdeli jóndeýden ótken. Óńirlik týrıstik kartanyń TOP-50 nysanyna engen, respýblıkalyq mańyzy bar „Han Ordasy“ murajaı-qoryǵyna aparatyn uzyndyǵy 21 shaqyrym jol jóndeýden ótkizildi. Sonymen qatar, 4 temirjol vokzaly jańǵyrtylýda», - dedi BQO ákimi Narıman Tóreǵalıev.