BQO oqýshylary Nazarbaev zııatkerlik mektepteriniń baǵdarlamasymen oqı bastaıdy
ORAL. QazAqparat - Batys Qazaqstan oblysynyń ákimdiginde «Nazarbaev zııatkerlik mektepteri» derbes bilim berý uıymynyń tájirıbesin taratý máselesine arnalǵan keńes ótti, dep habarlaıdy «QazAqparat» tilshisi.
Sharaǵa «Nazarbaev zııatkerlik mektepteri» derbes bilim berý uıymynyń basqarma tóraıymy Kúlásh Shámshıdınova qatysty.
Oblys ákimi Altaı Kólginovtiń atap ótkenindeı, Elbasy tapsyrmasyna sáıkes elimizde bilim salasynda da sapaly ózgerister oryn alýda. «Rýhanı jańǵyrý» baǵdarlamasyn júzege asyrýdaǵy basty krıterııdiń biri - qoǵamdaǵy bilim deńgeıiniń joǵary bolýy. Osy oraıda halyqaralyq bilim standarttaryna sáıkes Nazarbaev ýnıversıteti men zııatkerlik mektepter nátıjeli jumys atqaryp keledi. Zııatkerlik mektepter bilim berý baǵdarlamalarynyń qazirgi zamanǵy úlgilerin ázirleýmen birge, olarǵa monıtorıng jasap, zertteý, taldaý jumystaryn júrgize otyryp, júzege asyrady. Sondyqtan Nazarbaev zııatkerlik mektepteriniń tájirıbesin oblystaǵy barlyq bilim ordalaryna engizýdiń mańyzy zor. ıAǵnı jańartylǵan bilim mazmunynan eshkim de tys qalmaq emes. Osyǵan oraı Altaı Kólginov 22 qarasha kúni jańadan taǵaıyndalǵan oblystyq bilim basqarmasy basshysynyń aldyna qoıylǵan tapsyrmalardy oblystaǵy pedagog kadrlarynyń aldynda taǵy bir márte eske saldy.
Jıynda Kúlásh Shámshıdınova bilim salasyndaǵy mańyzdy maqsat-mindetterdi atap kórsetti.
Sondaı-aq óńir ustazdary jańartylǵan bilim mazmunyn engizýge baılanysty óz oı-tolǵamdarymen, is-tájirıbelerimen bólisti. Mysaly, Oral qalasyndaǵy A.Makarenko atyndaǵy №6 orta mektepke Nazarbaev zııatkerlik mektebiniń jumys tájirıbesi 2012 jyldan beri engizilýde. Sol sekildi jańartylǵan bilim berý úlgisine kóshýge baılanysty 2015-2016 oqý jylynda respýblıkadaǵy otyz mekteptiń qatarynda Oraldaǵy M.Yqsanov atyndaǵy №36 jáne Terekti aýdanyndaǵy Shaǵan orta mektepteriniń aprobatsııadan ótkeni málim. Qazirgideı bári ózgeriske túsip jatqan mezgilde pedagogtardyń kásibı deńgeıin kóterý de mańyzdy ról atqaratyny belgili. Eń bastysy, ár mektep jańashyldyqpen jumys jasasa, bilim deńgeıi de ósedi. Ortaq maqsat ta osy.
Mine, osyndaı ózekti máselelerdi talqyǵa salǵan jıyn sońynda «Nazarbaev zııatkerlik mektepteri» derbes bilim berý uıymy men BQO ákimdigi arasynda memorandýmǵa qol qoıyldy.
