BQO oqýshylary qyzmet sapasyn adamnyń túr-álpetinen anyqtaıtyn júıe jasady

ORAL. QazAqparat - Oral qalasyndaǵy Nazarbaev zııatkerlik mektebi oqýshylarynyń jobalary Almaty qalasynda ótken «INFOMATRIX-ASIA» halyqaralyq konkýrsynda úzdik dep baǵalandy, dep habarlaıdy QazAqparat tilshisi.

Halyqaralyq baıqaýda Qazaqstan ǵana emes, Túrikmenstan, Tájikstan, Qyrǵyzstan jáne basqa elderden kelgen qatysýshylar óz jobalaryn tanystyrdy.

Oraldaǵy Nazarbaev zııatkerlik mektebiniń málimetine qaraǵanda, 11-synyp oqýshysy Erjan Jamashev pen 10-synyp oqýshysy Danııar Jarqynuly «Kompıýterlik baǵdarlamalaý», al 9-synypta oqıtyn Elamır Qadyrǵaleev «Jabdyqtardy basqarý júıesi» sektsııalarynda altyn medal ıelendi.

Erjan men Danııardyń birlesken «Mojidet» jobasy - qyzmet kórsetý sapasyn anyqtaýdyń avtomattandyrylǵan júıesi. Arnaıy kameranyń kómegimen tutynýshynyń kóńil-kúıin bilýge bolady. Jas baǵdarlamashylardyń aıtýynsha, atalǵan jobany mektep oqýshylarynan quralǵan komanda daıyndady.

«Jazda akseleratsııalyq baǵdarlamaǵa ótinim bermekpiz. Budan keıin jobamyzdy daıyn ónim retinde usyna alamyz», - deıdi Danııar.

«Ideıa kóp. Biz tek joba jumystarymen aınalysyp qoımaı, mektep oqýshylaryn qatarymyzǵa qosylýǵa shaqyramyz. Ol úshin arnaıy klýb ashqymyz keledi», - deıdi aldaǵy josparymen bólisken Erjan.

Qos zııatkerge Qazaqstan-Brıtan tehnıkalyq ýnıversıtetiniń granty berildi. Sonymen qatar Erjan Súleımen Demırel atyndaǵy ýnıversıtette oqýǵa 50 protsent jeńildik aldy.

Saıystardan júldesiz qaıtpaıtyn Elamırdiń «Novel.Oculos» dep atalatyn jobasy kózi kórmeıtin jandarǵa arnalǵan. Arnaıy baǵdarlama aınaladaǵy zattardy tanýǵa múmkindik beredi. Jańashyl oqýshynyń bul jobasy qazylar tarapynan joǵary baǵalandy.

Eske sala keteıik, budan buryn oraldyq oqýshynyń ǵarysh keńistigine arnalǵan reaktor úlgisin jasap shyǵarǵanyn jáne taǵy bir shákirttiń AQSh pen Gonkongtyń 11 oqý ornynan shaqyrtý alǵanyn jazǵan bolatynbyz.