BQO-nyń Jergilikti polıtsııa qyzmetiniń basshysy kórshisiniń mazasyn alǵan ishimdikke qumar qala turǵynyn tártipke shaqyrdy (FOTO)
ORAL. QazAqparat - BQO jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllın Oral qalasyna qarasty Derkól kentinde bolyp, turǵyndarmen kezdesti.
BQO ІІD baspasóz qyzmetinen túsken málimetke qaraǵanda, azamattardy qabyldaý ýchaskelik polıtsııa beketinde uıymdastyryldy. Keshki mezgilge qaramastan, kelýshiler az bolǵan joq. Biri abattandyrý máselesin qozǵasa, ekinshileri qoǵamdyq jasaqtardy uıymdastyrý, jastar tárbıesi, páterlerdiń jaı-kúıin tilge tıek etti.
M.Ǵabdýllın ótinishterdiń bárin zeıin qoıa tyńdap, sol boıda sheshim alýǵa tyrysty. Mysaly, zeınetker Fedor Semenıhın tártipsiz kórshisiniń qylyǵyna shaǵymdandy. M.Ǵabdýllın bul turǵynmen jeke tanysýdy jón kórdi. Іshimdik ishýdi jaqsy kóretin 50 jasar turǵyn esikti ashqanda, polıtsııa polkovnıgi men onyń orynbasarlary kirip kelgenin kórgende, abdyrap qaldy. Qatań «sógisten» keıin álgi er adam endi ishpeýge, kórshisin mazalamaýǵa ýáde berdi.
«Halyq polıtsııaǵa senýi, onyń jumys jasap jatqanyn kórýi tıis. Sondyqtan azamattardy qabyldaý apta saıyn júrgiziletin bolady. Men ózim azamattardy qabyldap, olardyń mundaı qadamǵa nelikten baryp otyrǵanyn anyqtap, ýchaskelik ınspektorlardan talap etetin bolamyn. Árıne, ýchaskelik ınspektorlardyń jumysy kóp, biraq olar bárine úlgerýi tıis. Eń bastysy, halyqqa jaqyn bolsa, qylmys azaıyp, ony ashý deńgeıi jaqsarady», dedi M.Ǵabdýllın.
