BQO-nyń Zelenov aýdanynda memlekettik bıýdjetke 6,7 mlrd. teńge jınaldy
ORAL. QazAqparat - Zelenov aýdanynda ótken jyldyń 1 jeltoqsanyna deıin negizgi qarjyǵa qosylǵan ınvestıtsııa 95,6 mlrd. teńgege jetip, aldyńǵy jylǵydan 24,7 paıyzǵa asyp tústi, dep habarlaıdy «QazAqparat» HAA tilshisi.
Aýdan ákimi Kárim Jaqypovtyń aıtýynsha, sonyń ishinde respýblıkalyq bıýdjet esebinen 3,6 mlrd. teńge tússe, bul 2,9 esege artyq. Jergilikti bıýdjet esebinen 213,8 mln. teńge quıylyp, bul da 1,6 esege artty. Ózindik qarjy esebinen 87,3 mlrd. teńge qosylyp, bul 1,5 esege kóbeıdi.
Memlekettik bıýdjetke 6,7 mlrd. teńge jınalyp, ósim 2,7 esege jetse, sonyń ishinde aýdandyq qazynaǵa 1,9 mlrd. teńge tústi, bul aldyńǵy jylǵydan 24,7 paıyzǵa kóp. Respýblıkalyq bıýdjetke 2,2 mlrd. teńge (ósim - 3,3 ese), oblystyq qazynaǵa 2,6 mlrd. teńge (ósim - segiz ese) aýdaryldy.
«Ásirese, ótken jyly egin bitik shyǵyp, óńir turǵyndaryn qýantty. Oblysta eń astyqty aýdan sanalatyn Zelenovta 201 myń ga egistikten 210,9 myń tonna ónim alynyp, ortasha ónim ár gektaryna 17 tsentnerden keldi. Sonyń ishinde kúzdik bıdaıdan rekordtyq ónim (32,5 tsentner) alyndy. Keıbir sharýashylyqtarda 52 tsentnerge deıin jetti. Bıylǵy eginnen de úmit bar. 2016 jyly 41 myń gektar alqapqa kúzdik bıdaı sebildi, bul aldyńǵy jylǵydan 10 myń gektarǵa artyq», dedi «QazAqparat» tilshisine K.Jaqypov.
Aıta keteıik, oblystyq statıstıka departamentinen túsken málimetke qaraǵanda, ótken jyldyń on bir aıynda oblystaǵy ınvestıtsııa kólemi 340,2 mlrd. teńgege jetip, aldyńǵy jylǵydan 17,7 paıyzǵa kóbeıdi.
