BQO-nyń úsh turǵyny 800-den astam kıik múıizimen ustaldy
ORAL. QazAqparat – Batys Qazaqstan oblysynda úsh turǵyn 805 dana kıik múıizimen ustaldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa Bókeı ordasy aýdanynda boldy.
Jedel izdestirý sharalary barysynda Saıqyn-Bısen jolynyń 26-shaqyrymynda 1994 jylǵy eki jáne 1982 jylǵy bir turǵyn qolǵa tústi. Olar otyrǵan «VAZ-21214» avtokóliginen segiz qapshyqqa salynǵan 805 dana kıik múıizi tabylyp, tárkilendi.
Qazirgi kezde QR QK 339-baby 1-1-bóligine (kıikti zańsyz qolǵa túsirý, joıý, sol sııaqty zańsyz qolǵa túsirilgen kıikti nemese onyń derıvattaryn, onyń ishinde múıizderin ıemdený, saqtaý, ótkizý, ákelý, áketý, jóneltý, tasymaldaý) sáıkes sotqa deıingi tergeý amaldary júrgizilýde. Bul bap boıynsha aıypty dep tanylǵandar 3 jyldan 12 jylǵa deıin bas bostandyǵynan aıyrylýy múmkin.
Qylmystyq is boıynsha birneshe saraptama taǵaıyndaldy. Ustalǵan adamdardyń basqa da qylmystarǵa qatystylyǵy, olardyń sybaılastary, múıizdi ótkizetin oryndary anyqtalýda.
«Bul múıizderdiń quny shamamen 2 mlrd teńgeni quraıdy. Bul sońǵy jyldary brakonerlerden tárkilengen eń iri partııa bolyp esepteledi. Ótken jyly kıiktiń derıvattarymen zańsyz aınalysý boıynsha 61 derek tirkelip, sonyń 30-y sotqa deıin jetti. Bıyl 17 derektiń 8-i sotqa joldanyp úlgerdi. Qalǵan derekter boıynsha tergeý amaldary jalǵasýda», dedi QazAqparat tilshisine B.Belgibekov.
Eske sala keteıik, budan buryn Oralda dúken men aqsha aıyrbastaý pýnktin tonaǵandar ustalǵanyn jazǵan bolatynbyz.
