BQO-nyń Tasqala aýylynda tasqyn sý basý qaýpi saqtalyp otyr
BQO TJ departamentiniń jedel shtaby málim etkenindeı, Derkól ózenindegi sý deńgeıi kóterilý ústinde.
Tasqala aýdandyq TJ bóliminiń ınjeneri, azamattyq qorǵaý aǵa leıtenanty Meırambek Turarbekovtiń aıtýynsha, Tasqala aýylyndaǵy gıdrobeket málimeti boıynsha 4 sáýir kúni saǵat 20.00-de sý deńgeıi 435 santımetr bolsa, búgin tańǵy saǵat 05.55-te 443-ke jetken.
«Ózen sýy kóterilýiniń qaýipti shegi – 520 santımetr. Jaǵdaı birqalypty, baqylaýda bolǵanymen, aýyldy sý basý qaýpi seıilgen joq», dedi M.Turarbekov.
BQO TJ departamentiniń málimetine qaraǵanda, oblys boıynsha sý tasqynymen kúres jumystaryna 494 adam (134 tehnıka, 8 júzý quraly, 31 motopompa, 2 tikushaq) jumyldyrylǵan. 5 sáýir kúni tańǵy saǵat 04.00-de Mańǵystaý oblystyq TJ departamentiniń jeke quramynan 14 adam (2 tehnıka, 1 motopompa) Aqjaıyq aýdany Chapaev aýylyna aýystyryldy.
Oral qalasynda, Tasqala, Jánibek, Shyńǵyrlaý, Báıterek aýdandarynda erigen qar sýyn sorý jumystary jalǵasýda. Jyl basynan beri 120 240 tekshe metr sý soryldy.
Sondaı-aq Bórli (200), Jánibek (1450), Qaratóbe (1000) aýdandary men Oral qalasynda (700) qum salynǵan 3350 qappen bekitý jumystary júrgizildi.
Sońǵy táýlikte oblystyq mańyzy bar Fedorov-Aqsaı jolynyń 80-shaqyrymynda, jergilikti Jánibek-Talov jolynyń 120-shaqyrymynda jáne Kaztalov aýdanynda Qoshankól-Qaraoba jolynyń 52-shaqyrymynda joldardy sý basqany tirkeldi. Buǵan deıin sý shaıyp ketken Shyńǵyrlaý aýdanyndaǵy jergilikti jol ýchaskeleri baqylaýda.
Jánibek aýdany Jaqsybaı aýylynda sýǵa ketken 97 turǵyn úıdiń bárinen sý sorylyp alyndy. Kóshirilgen 639 adamnyń 60-y M.Yqsanov atyndaǵy mektepte ornalastyrylǵan.
Oblys aýmaǵynyń 20 paıyzynda (Tasqala, Báıterekte, Terekti aýdanynyń bir bóliginde) qar áli bar.
Transshekaralyq Jaıyq, Qaraózen, Saryózen, Shaǵan ózenderi men sý qoımalary boıynsha da monıtorıng júrgizilýde.
Eske sala keteıik, budan buryn BQO-da sý tasqynynan zardap shekkenderge kómek kórsetetin volonterlik shtab qurylǵanyn, Batys Qazaqstanda tótenshe jaǵdaı zardaptaryn joıýǵa 1,4 mlrd teńge qarastyrylǵanyn jazǵan bolatynbyz.