BQO-nyń Tasqala aýyly karantınge jabyldy
ORAL. QazAqparat – Batys Qazaqstan oblysynda Tasqala aýyly karantınge jabyldy, dep habarlaıdy QazAqparat tilshisi.
Aýdan ákimi Aldııar Halelovtiń Feısbýktegi paraqshasynda málim etkenindeı, aýdan aýmaǵynda qaýipti vırýstyń taralý qaýpi seıilmeı otyr.
Aýdanda epıdemıologııalyq jaǵdaı turaqsyz bolyp, sońǵy táýlikte vırýs juqtyrǵandar úsh adamǵa ósken. Osyǵan baılanysty aýdandyq bas memlekettik sanıtar dárigeriniń qaýlysyna sáıkes 28 mamyr kúngi saǵat 00.00-den bastap Tasqala aýylyn karantınge jabý týraly sheshim qabyldandy.
Kúni búginge deıin Tasqala aýyly boıynsha 19 turǵyn indetke shaldyqsa, sonyń 9-y jazylyp shyqty. Sonymen qatar basqa el men aımaqtan kelgen 28 aýyl turǵynynan da koronavırýs tabylyp otyr.
«Jumyla kótergen júk jeńil», demekshi, bul kúrdeli kezeńnen aman-esen shyǵýymyz árqaısysymyzdyń qolymyzda. Sondyqtan da aýdan turǵyndarynan qabyldanǵan sharaǵa túsinistikpen qarap, únemi betperde men qolǵap kıip, antıseptik qoldaný, basqa da sanıtarlyq talaptardy qatań saqtaý suralady», dedi aýdan basshysy.
BQO ákimdiginen alynǵan málimetke qaraǵanda, koronavırýs juqtyrǵan sońǵy 21 adamnyń 15-i – buryn aýyrǵandarmen qarym-qatynasta bolǵandar.
Tórt adamnan profılaktıkalyq maqsatta synama alynǵan kezde anyqtaldy.
Eki adam – Reseıde jumys jasaıtyn Shymkent pen Almaty qalasynyń turǵyndary. Bular «Tasqala» jáne «Aqsaı» avtoótkelderinen ótkennen keıin karantındik statsıonarǵa jatqyzylǵan.
Osylaısha oblysta aýyrǵandar sany 493-ke jetti.
Eske sala keteıik, budan buryn BQO-da sońǵy on kúnde koronavırýs juqtyrǵandardyń 70 paıyzǵa óskenin jazǵan bolatynbyz.
Sondaı-aq, oblysta Syrym aýdany men Jánibek aýdanynda eki aýyl karantınge jabylǵan bolatyn.
