BQO-nyń Tasqala aýdanynda karantındik jáne provızorlyq statsıonarlar ashyldy
ORAL. QazAqparat – BQO-nyń Tasqala aýdanynda karantındik jáne provızorlyq statsıonarlar ashyldy, dep habarlaıdy QazAqparat tilshisi.
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, bul statsıonarǵa Reseıden kelip, «Tasqala» avtoótkelindegi karantındik-statsıonarlyq beketten ótkender jatqyzylady.
«Eger kelgen adamdardan eshqandaı aýrý belgisi baıqalmaǵan jaǵdaıda ol karantındik statsıonarǵa ornalastyrylady. Sodan keıin osynda koronavırýstyń bar-joǵyn anyqtaý úshin zerthanalyq synama alynady. Koronavırýsqa shaldyqsa, jedel járdemmen oblystyq juqpaly aýrýlar aýrýhanasyna, al saý bolyp shyqsa, qalǵan 12 kúnge úı karantınine oqshaýlanýǵa jiberiledi. Al dene qyzýy kóterilgender nemese jóteli barlar provızorlyq statsıonarǵa jatqyzylady. Munda da synama alynyp, tıisti shara qabyldanady. Eger koronavırýs juqtyrmasa, osynda tolyq emdelip, úıine jiberiledi», dedi N.Mustaev.
Sońǵy kezde Batys Qazaqstan oblysynda koronavırýs juqtyrǵandardyń kópshiligi osy «Tasqala» beketinen ótip jatqany belgili.
Mysaly, buǵan deıin habarlaǵanymyzdaı, 19 sáýir kúngi saǵat 23.10-daǵy málimetke sáıkes Qazaqstanda jańadan 35 jaǵdaı tirkelse, sonyń 16-sy Batys Qazaqstan oblysynyń úlesine tıedi.
16 adamnyń 14-i Saratov oblysymen shekaradaǵy «Tasqala», qalǵan ekeýi Samaramen shektesetin «Syrym» beketi arqyly kelgen.
Qazirgi tańda BQO-da aýrý juqtyrǵandar sany 63-ke jetip, sonyń ekeýi jazylyp shyqty. Aýyrǵandardyń 55-i – shetten, sonyń ishinde 54-i – Reseıden kelgender.
Eske sala keteıik, budan buryn BQO-da sońǵy tirkelgen jeti naýqastyń Reseıden kelgenin jazǵan bolatynbyz.
