BQO-nyń ońtústik aýdandaryn sýmen qamtý jaqsara túspek

ORAL. QazAqparat - Reseıden alynatyn Edil sýyna táýeldilikti azaıtý jáne oblystyń ońtústik aýdandaryn sýmen qamtýdy jaqsartý maqsatynda «Qaztalov aýdany Aqpáter aýyly mańyndaǵy Qaraózenge Jaıyq-Kóshim júıesinen basseınaralyq sýdy jiberý úshin Kırov-Shejin arnasyn qaıta jańǵyrtý» jobasynyń ekinshi kezeńiniń qurylys jumystaryn aıaqtaýǵa respýblıkalyq bıýdjetten 60,98 mln. teńge qaraldy. Qazirgi tańda quny 2 mlrd. 401 mln. teńgeni quraıtyn jobanyń úshinshi kezeńi saraptamadan ótti, dep habarlaıdy «QazAqparat» HAA tilshisi.

Oblys ákiminiń birinshi orynbasary Arman Óteǵulovtyń aıtýynsha, atalmysh joba 2010 jyly bastalǵan bolatyn. Bıyl úshinshi kezeńniń qurylys-montaj jumystaryn bastaýǵa 1,5 mlrd. teńge bólindi. Bul joba tolyq júzege asqan kezde Qaraózen men Saryózendi toltyrý úshin jyl saıyn Reseıden aqyly túrde alynatyn 107 mln. tekshe metr sýdy 20 mln. tekshe metrge deıin kemitýge múmkindik týady. Edil sýyna táýeldilik azaıyp, jyl saıyn 305 mln. teńge únemdeledi. Munyń 36 myńnan astam turǵyny, 354 myń bas maly bar qos aýdan úshin mańyzy zor.

Oǵan qosa bıyl sý sharýashylyǵy nysandarynyń qurylys-montaj jumystaryna oblystyq bıýdjetten 288,4 mln. teńge qaraldy. Atap aıtqanda, Syrym aýdanynda jobalyq quny 107,8 mln. teńgeni quraıtyn, 2354 ga jaıylymdy sýarýǵa múmkindik beretin Óleńti sýarý júıesin qalpyna keltirý jáne Toǵanas aýylynda Sholaqańqaty sý qoımasyn 103,4 mln. teńgege kúrdeli jóndeý jumystaryn aıaqtaý kózdelýde. Sonymen qatar Terekti aýdanynda Jaıyq ózeniniń sol jaǵalaýyn sýmen qamtý maqsatynda jobalyq quny 133,5 mln. teńge bolatyn Jaıyq-Shalqar arnasynyń qalqymaly sorǵy stansasyna sý bógetin salýǵa 20 mln. teńge, Zelenov aýdany Peremetnyı aýylyndaǵy Derkól ózenine gıdrotehnıkalyq ımarattar (jobalyq quny 70,73 mln. teńge) qurylysyna 36 mln., Jánibek aýdanynda 1830 ga jerdi sýarýǵa múmkindik beretin Ábdilman jáne Sorkól jaıylymdaryn qaıta qurylymdaýǵa (quny 409,1 mln. teńge) 63,7 mln. teńge berildi.

«Osy jylǵa josparlanǵan sharalar túgel júzege asqan kezde 63 803 ga jaıylmaly jáne 11 603 ga turaqty sýarmaly jerdi sýmen qamtamasyz etýge múmkindik týady. Elbasymyzdyń 2017-2021 jyldar aralyǵynda respýblıka boıynsha 600 myń ga sýarmaly jerlerdi qoldanysqa engizý jónindegi tapsyrmasyna sáıkes halyqaralyq qarjy uıymdary esebinen óńirde 120 299 ga jaıylmaly jáne  25 492 ga turaqty sýarmaly jerdi qalpyna keltirý josparlanýda», -dedi «QazAqparat» tilshisine Arman Óteǵulov.