BQO-nyń Qaztalov aýdanyndaǵy mýzeı qazaq jylqysynyń tarıhynan syr shertedi
ASTANA. QazAqparat - Batys Qazaqstan oblysynyń Qaztalov aýdanyna qarasty Qoshankól aýylynda qazaq jylqysynyń tarıhynan syr shertetin «Sáıgúlik» atty mýzeı jumys istep tur, dep habarlaıdy 24.kz.
Maqsat - keıingi jas býynnyń Qambar ata túligine degen qyzyǵýshylyǵyn oıatý. El arasynda saqtalǵan biregeı at ábzelderin murajaı qoryna jınaý. Bir qyzyǵy, osyndaı ıgilikti is aýyl turǵyndarynyń kómegimen uıymdastyrylǵan eken. Jylqyny «maldyń patshasy» dep qasterlegen halqymyz at ábzelderine de aıryqsha mán bergen. Mýzeıden sonyń eń kóne úlgilerin kezdestirýge bolady. Olardyń arasynda er-turman, ómildirik pen quıysqan, úzeńgi, aıyl, noqta, júgen sııaqty ábzelder bar.
Keıbiriniń tarıhy tipten qyzyq.
«1941-1945 jyldary Ekinshidúnıejúzilik soǵysqa barǵan atalarymyz sol jerdegi soǵysqa qatysqan jylqylardyń ábzelderin osynda ákelip urpaqtan urpaqqa berip, olardyń urpaqtary osynda ákelip tapsyrdy. Sol bir qundy zattar osy murajaıda tur. Jylqynyń tarıhy jóninde, jylqynyń Qazaqstanda tabylǵan jerleri barlyǵy osynda jazylǵan»,-deıdi Qoshankól aýylynyń turǵyny Aıan Kárımollın.
Qoshankóldikter mýzeı ashýmen shektelmepti. Aýyl mańyndaǵy tabıǵaty ásem jerde jazǵy lager jumys isteıdi. Munda tájirıbeli atbegiler jetkinshekterge jylqyny baptaýdyń qyr-syryn úıretedi.
«Bul lagerdiń eń basty qyzyǵy atqa miný. Jyl saıyn bolyp turady. Atqa miný adam densaýlyǵyna paıdaly»,-deıdi Qaraoba aýylynyń turǵyny Tursynbek Qydyrǵalıev,
Mýzeıde talaı alaman báıgede olja salǵan júırikter týraly nebir qyzyqty derekter jınaqtalǵan. Jylqy malynyń sıpaty men ony kútip baptaý týraly málimetter de mol.
«Maqsatymyz keleshekte murajaıdy jańa jádigerlermen tolyqtyryp, týrıster tamashalaıtyn orynǵa aınaldyrý»,- deıdi aýyl turǵyndary.
