BQO-nyń Qaztalov aýdanynda jańa sý qoımasy salynady
Óńirdegi sý salasynyń mamandary vedomstvo basshysyna egistikterge sýdyń jetispeýshiligi máselesi men sý qoımalarynyń ahýaly týraly baıandady, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń Telegram kanalyna silteme jasap.
Oral qalasynan 440, Qaztalov aýdanynyń ortalyǵynan 70 shaqyrym qashyqtyqta, «Kishi ózen» ózeninde ornalasqan qoıma memleketaralyq mándegi sý toraby bolyp esepteledi. Qoıma Kishi ózen sýyn Reseıdiń Saratov oblysy men Qazaqstannyń Batys Qazaqstan oblysyna bólýge, eki oblystyń lımandaryna sý ózindik aǵynmen berilýi úshin sý tiregin qurýǵa arnalǵan.
Al Úlken ózen boıynsha Reseı Federatsııasynan táýeldilikti azaıtý boıynsha qazir jańa sý qoımasyn salý josparlanyp otyr. Ol Úlken ózende, Qaztalov aýdanynyń Jalpaqtal aýylynda ornalasady. Sonymen qatar, óńirdiń ońtústik aýdandaryna Úlken jáne Kishi ózenderi boıynsha turaqty sý jetip turýy úshin Edil ózeninen 135 mln tekshe metr sý alý máselesi qarastyrylýda. Bul maqsat úshin respýblıkalyq bıýdjettten 3,5 mlrd teńge bólý kerek.
Reseıdiń Edil ózeninen Varfolomeı qoımasy arqyly oblystyń Jánibek, Qaztalov, Janǵaly aýdandaryndaǵy 1637 gektar turaqty sýarmaly egistikke, 44018 gektar lımandyq (saǵalyq) sýarý alqabyna, 324700 gektar sý basqan jaıylymdarǵa sý jiberiledi. Budan bólek, BQO-nyń ońtústik aýdandaryndaǵy ekologııalyq ahýaldy rettep otyrý úshin Aıdyn, Saryaıdyn, Qambaqty jáne Qamysh-Samar kól aıdyndaryn sý jiberilip otyrady. Sý qoımasynyń syıymdylyǵy - 23 mln metr kýb.
