BQO-nyń Kaztalov aýdanynda 16 aýylǵa gaz tartyldy

ORAL. QazAqparat – Batys Qazaqstan oblysynda Respýblıka kúnine oraı úsh aýylda kógildir otyn alaýy jaǵyldy, dep habarlaıdy QazAqparat tilshisi.

Kaztalov aýdany Jańajol aýyldyq okrýginiń Ábish, Kókterek okrýgterine qarasty Elaman, Saraljyn eldi mekenderine tabıǵı gaz qubyry tartyldy.

Aýdan ákimi Rústem Zulqashevpen birge kógildir otyn alaýyn jaqqan Ábish aýylynyń turǵyny, eńbek ardageri Amangeldi Ámireshov gaz qubyryn tartqan «Álııa Servıs» JShS men ishki jumystardy jasaǵan «GazGıd» JShS ókilderine rızashylyǵyn bildirdi.

Sondaı-aq 9 úıi bar Elaman eldi mekeninde Uzaqbaı Qojantaev ta Prezıdent tapsyrmasyna sáıkes óńirde tıisti jumystardyń atqarylyp jatqanyn jetkizdi. Al Saraljynda 56 úıdiń 48-ine gaz jelisi tartyldy.

Aýdan basshysynyń aıtýynsha, 29 myńnan astam turǵyn turatyn Kaztalovta barlyǵy 48 aýyl bolsa, sonyń 32-si gazben qamtylǵan.

«Bıyl 16 shaǵyn eldi mekenge gaz qubyryn tartý jumystary júrgizildi. Sonyń úsheýine kógildir otyn jetse, 27-28 qazanda taǵy bes aýylda osyndaı qýanyshty rásim bolmaq. Qalǵan 8 aýylǵa qarasha aıynda gaz beriledi. Qazirgi kezde qurylys jumystary negizinen aıaqtalyp, abonentterdiń qujattaryn retteý, tıisti qural-jabdyqtar ornatyp, gazǵa qosý jumystary júrgizilýde. Jyl sońynda aýdan turǵyndary túgeldeı tabıǵı gazben qamtylatyn bolady», dedi QazAqparat tilshisine R.Zulqashev.