BQO-nyń Darııan aýylynda jańa mektep salynyp, mádenıet úıi kúrdeli jóndelmek
ORAL. QazAqparat - Zelenov aýdany Darııan aýylynda bıyl jańa mektep salynyp, mádenıet úıi kúrdeli jóndelmek, dep habarlaıdy «QazAqparat» HAA tilshisi.
Aýdan ákimi Kárim Jaqypovtyń aıtýynsha, 100 oryndyq beıimdelgen ǵımaratymen 300 oryndyq qazaq orta mektebiniń qurylys quny jobalyq-smetalyq qujattamaǵa sáıkes respýblıkalyq bıýdjet qarjysy esebinen 1,1 mlrd. teńgeni quraıdy. Qurylysty bastaýǵa 401,4 mln. teńge bólindi. Buryn Prıýral aýdanynyń ortalyǵy bolǵan Darııanda aýyldyq mádenıet úıin kúrdeli jóndeýge 214,7 mln. teńge qaralyp otyr. Oǵan qosa Batýrın, Kamen jáne Zelenyı orta mektepterin kúrdeli jóndeý men qaıta jańartý úshin jobalyq-smetalyq qujattamasyn jasaýǵa aýdandyq bıýdjetten 6,4 mln. teńge berildi. Sonymen qatar aýdan ortalyǵy Peremetnyıda 661,9 mln. teńgege, Darııanda 217,2 mln. teńgege aýylishilik joldardy kúrdeli jóndeý úshin jobalyq-smetalyq qujattama jasaldy. Aýylishilik sý qubyryn júrgizý men qaıta qurý úshin Aqjol men Volodar aýyldaryna respýblıkalyq bıýdjetten 100 mln. teńge, Pavlov pen Darııanǵa oblystyq qazynadan 111,6 mln. teńge qarastyryldy. Vladımırov, Kishi Shaǵan, Mırnyı, Kırsanov aýyldaryna gaz tartý úshin tehnıkalyq ekonomıkalyq negizdeme jasaý úshin aýdandyq bıýdjetten 6 mln. teńge, Fakelge osyndaı jumysqa jobalyq-smetalyq qujattama jasaýǵa 4 mln. teńge berildi.Eldi mekender kóshelerin jaryqtandyrýǵa 73,1 mln. teńge, Peremetnyıda dene shynyqtyrý-saýyqtyrý kesheni qurylysyn bastaýǵa jergilikti bıýdjetten 73 mln. teńge bólindi. Al Dostyq aýylynda «Turalıeva A.S.» jeke kásipkerligi memlekettik-jekemenshik áriptestik baǵdarlamasy aıasynda aýysymyna 100 baldyrǵandy qabyldaı alatyn jeke balabaqsha salýdy kózdelip otyr.«Osy qańtar aıynda Elbasy Jarlyǵyna sáıkes ótetin ákimderdiń turǵyndarmen dástúrli eseptik kezdesýlerinde ótken jyldy qorytyndylap, aldaǵy jumystardy naqtylaı túsetin bolamyz», dedi K.Jaqypov.Aıta keteıik, 2016 jyly Ozernyı aýylynda 48 oryndyq Kırov negizgi mektep ǵımaraty 217 mln. teńgege jańadan salynsa, aýdan ortalyǵynda Peremetnyı orta mektebin kúrdeli jóndeýge 162 mln. teńge, taǵy 8 bilim ordasyn aǵymdaǵy jóndeýge 74 mln. teńge jumsalǵan bolatyn. Rýbejın aýyldyq klýby kúrdeli jóndelse, taǵy tórt klýb aǵymdaǵy jóndeýden ótkizildi.Aýdanda 31 bilim ordasynda beınebaqylaý quraly ornatylsa, 3 shaǵyn jınaq mektebi mýltımedıa jabdyqtarymen qamtyldy. Oblystyq bıýdjet esebinen 20 mektepke 107 jańa kompıýter alyndy.Jańa jyl merekesi qarsańynda birneshe mektepke jańa kólikter tabys etildi.Oblysta Darııan mektebinen basqa bıyl Oral qalasynda taǵy tórt mektep boı kóteretin bolady.
