BQO-nyń burynǵy sport basqarmasy basshysynyń isi: Kýágerlerden 123 mln teńge óndirý kózdelýde
ORAL. QazAqparat - BQO Dene shynyqtyrý jáne sport basqarmasynyń burynǵy basshysy Músilim Ońdaǵanovtyń isi boıynsha kýágerlerden 123 mln teńge óndirý kózdelýde, dep habarlaıdy QazAqparat tilshisi.
Oblystyq dene shynyqtyrý jáne sport basqarmasy basshysynyń orynbasary Jeńis Nyǵmetýlınniń aıtýynsha, jattyqtyrýshylar men osy mekemeniń basqa da qyzmetkerlerinen, barlyǵy 28 adamnan atalǵan qarjyny óndirý jóninde sotqa talap-aryz berilgen.
Bul adamdar Ońdaǵanovtyń isi boıynsha sotqa kýá retinde qatysqanymen, ózderiniń is-áreketine ókinetindigine baılanysty qylmystyq jaýapkershilikten bosatylǵan edi. Alaıda sot olardan keltirilgen zalaldy óndirýge bolatyndyǵyn aıtqan edi.
BQO qylmystyq ister jónindegi mamandandyrylǵan aýdanaralyq sotynyń 2014 jylǵy 17 aqpandaǵy úkimimen M.Ońdaǵanov 12 jyl, sondaı-aq Meńdihan Jákenov 11 jyl, Qonys Jetpisov jáne Turarbek Bekarystanov 8 jylǵa bas bostandyǵynan aıyrý jazasyn qatań tártiptegi kolonııada óteýge sottalǵan edi. Olarǵa uıymdasqan top quryp, 170 mln astam teńge bıýdjet qarjysyn jymqyrdy degen aıyp taǵyldy.
J.Nyǵmetýllınniń aıtýynsha, sot sol kezde prokýratýra men oblystyq dene shynyqtyrý jáne sport basqarmasynyń atyna memleketke keltirilgen zalaldy sottalýshylardan teń kólemde óndirý jóninde qaýly shyǵarǵan edi. Bir epızod boıynsha 123 mln teńge, ekinshisi boıynsha 11 mln teńge.
«Zalal osy kezge deıin óndirilmegendikten, biz bul máseleni sheshý úshin prokýratýraǵa da, sotqa da hattar jazdyq. Sodan keıin sotqa talap-aryzben júginýdi uıǵardyq. Alty jaýapkerge qatysty 11 mln teńge zalaldy óndirýge qatysty talap-aryz berýdiń merzimi ótip ketkendikten, ol qanaǵattandyrylmady. 123 mln teńgeni óndirý jónindegi talap-aryz qazir sotta qaralýda», dedi «QazAqparat» tilshisine Jeńis Nyǵmetýllın.
