BQO-nyń birneshe aýyly jańa jyldy jaryqsyz qarsy aldy
ORAL. QazAqparat - Bókeı ordasy aýdanynyń Uıaly, Saraljyn jáne T.Masın aýyldyq okrýgteri jańa jyldy jaryqsyz qarsy aldy, dep habarlaıdy «QazAqparat» HAA tilshisi.
Uıaly aýyldyq okrýginiń ákimi Baqytjan Orazǵulovtyń aıtýynsha, elektr jaryǵy 31 jeltoqsan kúni shamamen 22.00-derde sónip, 1 qańtar kúni 03.30-darda qaıta jandy. Kórshiles Saraljyn, T.Masın okrýgterinde de osyndaı jaǵdaı oryn aldy.
«Bókeı ordasy aýdanynyń úsh aýyldyq okrýginde jaryqtyń sónip qalǵany ras. Arnaıy brıgada shyǵyp, joǵary kerneýli elektr jelisindegi aqaýdy jóndep, qaıta qosty. Bórli aýdanynda da birneshe saǵatqa elektr jaryǵy sónip qalǵan jerler bar. Búgin tańerteń saǵat 08.00-de Oralǵa qarasty Derkól aýylynyń teń jartysy jaryqsyz qaldy. Qazir jóndeý jumystary júrgizilýde. Kúnniń jylynyp, elektr symdaryna muzdyń qatýyna baılanysty áli de osyndaı jaǵdaılar bolýy yqtımal. Sondyqtan brıgadalar jan-jaqqa shyǵyp, jumystanýda», dedi «QazAqparat» tilshisine «Batys Qazaqstan elektr jelilerin taratý kompanııasy» AQ basqarma tóraǵasy - dırektory Qýat Mýsın.
