BQO-nyń birneshe aýdanynda dalalyq jerler órtendi
ORAL. QazAqparat - Batys Qazaqstan oblysynyń birneshe aýdanynda dalalyq jerler órtendi, dep habarlaıdy «QazAqparat» tilshisi.
BQO TJ departamenti órt sóndirý jáne apattyq-qutqarý jumystary qyzmetinen alynǵan málimetke qaraǵanda, 14 qyrkúıek kúni saǵat 12.52-de Zelenov aýdany Kóshim jáne Úlken Shaǵan aýyldarynyń mańynda qurǵaq shóptiń janyp jatqany jóninde habar túsken. Órt sóndirýge 5 tehnıka, 36 adam, sondaı-aq erikti órt jasaqtary men jergilikti turǵyndar jumyldyryldy. «Tilsiz jaý» búgin saǵat 09.29-da aýyzdyqtaldy.
Sol sekildi keshe Jańaqala aýdany ortalyǵy Jańaqala aýyly mańynda 20 gektar jerdegi turmystyq qaldyqtar men qurǵaq shóp otqa orandy. Munda 4 tehnıka, 22 adam órt sóndirýge qatysqan.
14 qyrkúıek kúni Oral qalasy aýmaǵyndaǵy Jeltaý (Svıstýn gora) mańynda jol janyndaǵy 2,5 ga qurǵaq shóp pen ishinara orman jalynǵa sharpyldy. 15 qyrkúıekke qaraǵan túni saǵat 00.33-te sóndirilgen órtti aýyzdyqtaýǵa 4 tehnıka, 19 adam jumyldyryldy.
Sondaı-aq keshe Qaztalov aýdany Jańajol jáne Kókterek aýyldyq okrýgterinde 367 ga aýmaqta qurǵaq shóp jandy. 4 tehnıka, 21 adam qatysqan bul órt te sóndirildi.
Oral qalasynda 14 qyrkúıek kúni «Rezerv» MKK aýdanynda 5 ga jerdegi qurǵaq shóp janyp, sóndirildi (2 tehnıka, 12 adam).
Keshe keshkisin Bórli aýdany Pýgachev aýyldyq okrýgterinde 30 ga jerdegi qurǵaq shóp pen aǵash butalary otqa oranyp, «tilsiz jaýǵa» toıtarys berildi (1 tehnıka, 5 adam).
15 qyrkúıekke qaraǵan túni saǵat 00.05-te Bórli aýdanynda Aqsaı-Orynbor kúre jolynyń 35-shaqyrymynda 27 ga jáne Prıýral aýyly mańynda 13 ga qurǵaq shóp janyp, 02.25-te sóndirildi (3 tehnıka, 9 adam).
Búgin saǵat 06.25-te Bórli aýdany Pýgachev aýyly men Qaraoba ózeni mańynda 20 gektar qurǵaq shóp pen aǵash butalary otqa sharpylyp, 08-50-de sóndirildi (1 tehnıka, 4 adam).
Eske sala keteıik, bıyl óńirde dala órtteri jıilep ketti. Sonyń saldarynan Qaztalov pen Shyńǵyrlaý aýdandarynda eki adam kóz jumǵan bolatyn.
