BQO-nyń bir aýdanynda karantındik sharalar kúsheıtildi
ORAL. QazAqparat – Báıterek aýdanynda 13 qańtardan bastap karantındik shekteý sharalary kúsheıtildi, dep habarlaıdy QazAqparat tilshisi.
Báıterek aýdany bas memlekettik sanıtar dárigeri Aıat Úmbetálıevtiń qaýlysyna sáıkes memlekettik organdar men kvazımemlekettik sektor uıymdary qyzmetkerleriniń keminde 80 paıyzy qashyqtan jumys isteýge kóshiriledi.
Sondaı-aq jeke kásipkerlik qyzmetkerleriniń kem degende 50 paıyzyn qashyqtan jumys isteýge kóshirý usynyldy.
Birinshi kezekte jasy 50-de jáne odan asqandar qashyqtan jumys isteýi tıis.
Sport jarystaryn, kórme, forým, konferentsııa, kontsert, sondaı-aq otbasylyq, eske alý jáne basqa kóp adam qatysatyn is-sharalardy ótkizýge tyıym salyndy.
Monıtorıngtik toptar jumysy shıratylady. Koronavırýstyq juqpanyń keń taralýyna jol bermeý maqsatynda saýda, qoǵamdyq tamaqtandyrý oryndarynda, bazarlarda, demalys bazalarynda, qoǵamdyq kólikte sanıtarlyq-dezınfektsııalyq rejimniń saqtalýyn baqylaý kúsheıtiledi.
BQO sanıtarlyq-epıdemıologııalyq baqylaý departamentiniń málimeti boıynsha Báıterek aýdanynda jyl basynan beri 61 adamnyń koronavırýs juqtyrǵany tirkeldi.
Eske sala keteıik, budan buryn Batys Qazaqstan oblysynda 184 balanyń koronavırýstan jazylǵanyn jazǵan bolatynbyz.
